Loluwari Média (Díli) – Governu Timor-Leste liu-husi Ministériu Defeza (MD) hamutuk ho Ángola sei hafoun fali akordu kooperasaun bilaterál iha setór defeza.
Ministru Defeza (MD), Kontra Almirante Donanciano Costa Gomes “Pedro Klamar Fuik” hatete,Angola sempre fó apoiu mai ita, liu-liu iha estabelesimentu kooperasaun ba dezenvolvimentu Forsas Armadas nian.
“Iha okaziaun ida-ne’e, Señor Ministru mai para além de partisipa iha reuniun,ita mós haree fila-fali portfóliu ne’ebé ko’alia kona-ba kooperasaun,” dehan nia ba jornalista sira iha Kuartel General Fatuhada Díli, Segunda (01/06).
Tanba ne’e tempu badak, nasaun rua ne’e sei asina akordu foun hodi hametin liután relasaun bilaterál iha setór defeza, nune’e bele lori asaun reál ba di’ak povu hodi defende integridade territoriál no komunidade lian portugés nian.
Iha fatin hanesan,Ministru Defeza Angola, Lúçio Gonçalves Amaral ninia vizita mai TL ne’e atu partisipa iha Reuniun ba dala 25 Ministru Defeza CPLP nian, maibé mós hanesan oportunidade di’ak ida atu ko’alia ho Ministériu Defeza no Forsas Armadas TL nian.
“Ita-nia akordu kooperasaun ne’e eziste kleur ona. Maibé, hanesan ita hotu hatene, dinámika moris nian no situasaun jeopolítika internasionál kontinua muda”
Tanba ne’e nasaun rua iha obrigasaun atu hadi’a hodi la bele hela ba kotuk tanba Angola mai iha ne’e atu define fali ajustamentu foun ne’ebé presiza iha akordu entre nasaun rua ne’e.
Jornalista Estajiariu : Quintão dos Santos Tilman
Editór : Herminio Cardoso