Loluwari Média (Díli) – Prezidente Repúblika, José Ramos-Horta hatete, Parlamentu Nasionál (PN) tenke haree didi’ak proposta alterasaun Kódigu Penál ne’ebé atu kriminaliza difamasaun atu labele hamate liberdade imprensa iha Timor-Leste.
Tanba ne’e PR Horta konsidera PN so bele gastu tempu de’it hodi deskute halo alterasaun ba Lei Kódiku penál, maibé di’ak PN tenke Priorioritiza Estadu nian fokus liu ba aselerasaun investimentu no kria empregu ba sidadaun sira.
“Labele lakon tempu ho lei ida ne’e, hatun tiha lei ne’ebé atu limita liberdade imprensa, Timor-Leste kontinua sai ezemplu di’ak ida ba mundu tomak tanba povu no joven sira luta ho sakrifísiu boot atu hetan liberdade, atu kriminaliza difamasaun husi média,hau la promulga” Dehan Prezidente Repúblika, José Ramos-Horta, ba jornalista sira iha Hotel Timor, Díli, Kuarta(10/06)
Xefe Estadu esplika, difamasaun la akontese de’it iha média, maibé mós iha espasu polítiku,inklui iha Parlamentu Nasionál, ne’ebé polítiku sira dala-barak halo akuzasaun ba malu.
“Se hakarak kriminaliza difamasaun, tenke haree no aplika hanesan ba ema hotu-hotu. Iha Parlamentu mós, deputadu sira halo akuzasaun ba malu, nune’e ida ne’e mós forma difamasaun, entaun tenke sukat hotu-hotu ho maneira hanesan, la’ós de’it ba jornalista sira,” hatete nia.
Prezidente Repúblika akresenta, katak liberdade imprensa sai fatin importante ba demokrasia Timor-Leste no kontinua hetan rekonesimentu internasionál, nune’e Estadu tenke proteje ho valór.
Molok ne’e, Estudante Universitáriu Timor-Leste (EUTL) manifesta preokupasaun kona-ba proposta alterasaun Kódigu Penál ne’ebé prevé kriminalizasaun difamasaun no injúria.
“Ami husu ba públiku atu halo vijilánsia ba proposta alterasaun Kódigu Penál ne’ebé prevê kriminalizasaun difamasaun no injúria. Asuntu ida ne’e relasiona diretamente ho liberdade espresaun no direitu sidadaun sira nian atu partisipa iha vida demokrátika,” dehan Porta-voz EUTL, Natalizio Nunes Martins, ba jornalista sira iha Kampus Sentral UNTL, Díli, terça-feira (09/06).
Natalizio hatete katak proposta refere presiza hetan diskusaun klean no partisipasaun públika antes aprovasaun, atu asegura katak alterasaun legal sira la hamenus liberdade espresaun no liberdade imprensa.
EUTL mós apela ba sosiedade sivíl, akademiku, jornalista no públiku jerál atu kontinua akompaña prosesu legislativu refere hodi garante proteksaun ba liberdade fundamentál sira ne’ebé garantia ona iha Konstituisaun Repúblika Demokrátika Timor-Leste.
Jornalista Estajiária : Arcângela dos Santos Pereira
Editór : Herminio Cardoso