Loluwari Media (Dilí) – Semana oin komisaun prosesu rekrutamentu ba vaga Polísia Nasionál Timor-Leste (PNTL) foun komesa ona hodi re-teste ba kandidatu rihun 12 ne’ebé molok ne’e konkore ona.
Ministru Interiór (MI), Francisco da Costa Guterres hatete, semana oin komisaun rekrutamentu hahú re-teste ba rekrutamentu vaga membru PNTL foun rihun 12 resin ne’ebé antes ne’e konkore ona iha rekrutamentu vaga membru PNTL foun tinan 2025.
“Data fiksu ne’e semana oin ita nia (komisaun) komesa halo servisu ona, servisu verifikasaun ba dadus sira, Verifikasaun dadus ne’e iha semana rua hotu, kompleta hotu tiha sira públika ona naran sira ne’ebé tuir teste,para depois fó tempu komisaun atu públika kalendariu ba teste.” Dehan Ministru Interiór (MI), Francisco da Costa Guterres ba jornalista sira iha Ministeriu Interiór Vila-Verde Dilí, kinta (18/06).
Nia haktuir, prosesu re-teste ne’e komisaun liu-husi juri rekrutamentu sei uza faze teste haat no sistema eleminatóriu, faze ida mak verifikasaun dadus konkorente sira.
Bainhira konkorente sira la liu iha faze selesaun dokumentu ne’e automátikamente elemina ona, kuandu liu entaun nia pasa ba teste prova kulturál kuandu pasa entaun ba faze tuir mai mak teste pisikolojia kuandu la pasa entaun elemina kuandu pasa entaun pasa ba teste saúde.
“Ita nia komisaun rekrutamentu sira halo verifikasaun dokumentu sira ne’ebé la priense rekezitus hela, haree took sira nia dokumentu ne’e. Segundu haree ona ba teste, sé nia dokumentu kompletu nia ba ona teste.”
Teste tolu ne’e mak hanesan prova kulturál depois mai teste pisikolojia ka pisikotest no ida fali teste saúde, ne’ebé ida ne’ebé mak hela iha teste prova kulturál nia la pasa.
“Ita mantein dadus anterior, depois sira sae ba mak ida ne’ebé hela kontinua hela, ida ne’ebé hela fali iha psikotest ka teste pisikolojia nia hela ona. Ikus liu grupu ne’ebé liu ne’e mak ba liu ona teste saúde, saúde mak hela tan balun ne’e testu tama. Ne’e ita aplika eleminatoriu hotu kedan.”
Nia Informa, Kritériu idade ne’e la iha mudansa kandidata tinan 18 too 23 la halo mudansa bainhira konkorente sira ne’e tuir teste kuandu númeru ida ne’ebé mak liu iha faze ida. momentu ne’ebá kedan komisaun anúnsia kedan no sei anúnsia fali kona-ba kalendariu teste pisikolojia.
“Teste ne’e liu loron ida ka rua komisaun fó sai kedan rezultadu ne’ebé ema ne’ebé mak nia valór la priense nia mak hela liu iha teste sira ne’e.”
Tanba Iha fulan Agustu prosesu rekrutamentu vaga membru PNTL foun konklui no iha Setembru konkorente sira tama ona iha sentru formasaun Polisia.
Tanba iha Fevereiru 2027 komesa finaliza sira nia kursu no koloka ona sira hodi komesa halo servisu polísia hodi reforsa instituisaun PNTL.
“Ita espera katak iha fulan agustu fim de agustu prinsipiu Setembru ne’e sira tama ona para sira kompleta sira ba fulan Setembru, Outubru Novembru kompleta sira nia kursu ne’e iha fevereiru ita koloka ona sira ba fatin-fatin sira hodi reforsa kedan servisu polísia tantu unidade inklui Munisipiu sira hotu.”
Orsamentu ba rekrutamentu vaga membru PNTL foun ne’e iha aumenta oituan husi millaun ida ba millaun ida-resin.
“Orsamentu ba ida ne’e tanba ita iha Aumenta tan númeru entaun ita tenke aumenta farda entaun ita aumenta tan osan ita gasta tan millaun ida- resin.”
Tuir lolos MI atu implementa rekrutamentu vaga membru PNTL foun ne’e iha Maiu maibé tanba proposta husi PNTL husu para aumenta tan númeru vaga rekrutamentu husi 400 aumenta tan 350.
Tanba ne’e tenke lori ba Konsellu Ministru para husu aprovasaun foun husi fali aprovasaun ba 350 ne’e ne’ebé aprova ona ne’ebé foin lalais publika ona.
“Ne’ebé agora ami halo ona nia prosedimentu agora semana oin ne’e entrega ona, komandu sira juri sira komesa servisu.”
Entretantu Xefe ba Juri ba Komisaun Rekrutamentu vaga PNTL ne’e lideradu husi Komisáriu Asisténte Polísia José Soares no Superintendente Xefe Polísia Ismael Babo no husi Ministeriu Interiór la tama.
Jornalista : Cesar Pires
Editór : Herminio Cardoso