Loluwari Média (Díli) – Tribunál Judisiál Primeira Instánsia Díli (TJPID) hahú ona prosesu primeiru interogatóriu judisiál ba arguidu na’in-61 ne’ebé involve iha kazu Scam call centre iha Tibar, Postu Administrativu Bazartete, Munisípiu Likisá.
Iha julgamentu primeiru interogatóriu prezide husi Juiza Turnu Ercilia de Jesus ne’ebé foin rona arguidu na’in-rua RW no AV no Prosesu interogatóriu ba arguidu sira seluk sei kontinua iha loron tuir mai.
Ministériu Públiku (MP) liu-husi Prokuradór Matias Soares, promove krime haat hasoru arguidu sira bazeia ba Kódigu Penál Timor-Leste, mak kona-ba Asosiasaun Kriminozu ne’ebé previstu iha Artigu 188,Esplorasaun Ilísitu ba Jogu previstu iha Artigu 322,Brankeamentu Kapitál previstu iha Artigu 313,no mós Fraude Fiskál iha Artigu 314.
Kazu ne’e rejista iha Ministériu Públiku ho Númeru Uniku Kazu (NUK) 227/26.PNSIK.
Diretór Diresaun Servisu Investigasaun Kriminál Nasionál (DSIKN), Superintendente Xefe Polísia João Belo dos Reis. FOTO (Cesar Pires).
Enkuantu iha parte seluk Diretór Diresaun Servisu Investigasaun Kriminál Nasionál (DSIKN), Superintendente Xefe Polísia João Belo dos Reis hatete,PNTL halo Servisu krime Organizadu husi International Scaming call Center iha parte SK hotel iha area Tibar Munisípiu Liquiça.
“Depois ami halo Investigasaun hotu ami aprejenta ba Ministériu públiku (MP) no ohin 61 halo ona Primeiru Interogatoriu ba Tribunál Primeiru Instansia.” Diretór Diresaun Servisu Investigasaun Kriminál Nasionál (DSIKN), Superintendente Xefe Polísia João Belo dos Reis ba jornalista sira iha Komandu Jerál PNTL Kaikoli Díli, Segunda (29/06).
Nia dehan,Scamming call Center (Pusat Penipuan Online) ne’e sentru ida ne’ebé kriminozu sira halo hodi habosok ka lansa informasaun habosok ema ne’ebé PNTL kaptura ona estranjeiru na’in 61 ne’ebé aprejenta ona ba MP.
“Tuir informasaun ne’ebé ami hetan sira ne’e mak Autór sira ba Scaming call Center iha Cambodia no agora dadaun mak aplika Scaming call Center iha Timor-Leste ne’ebé ita detein hotu iha sela DNSIK tanba sira ne’e mak Autór iha Cambodia tanba ne’e ita halo Scaming ba sira nia Viagen iha Timor-Leste.”dehan nia.
Evidénsia sira ne’ebé Autoridade Seguransa PNTL asegura mak Komputadór, Routers,Starlink no Kadeira meza ne’ebé sira utiliza no Ootel refere PNTL dada Polisia line ona atu nune’e ema seluk labele asesu ba Hotel durante prosesu Investigasaun lao.
Tanba sidadaun estranjeiru sira ne’e PNTL foti ona sira nia pasaporte atu nune’e sira labele halai ses husi Teritoriu Nasionál no husu ba komunidade atu labele sai vítima bebeik ba krime Online sira.
“tanba ema barak mak uza via Online hodi fa’an karreta, Motór no prémiu barbarak”dehan nia.
Entretantu Autoridade Seguransa PNTL sei kontinua halo operasaun hodi sobu rede krime internasionál ne’ebé estabelese iha Timor-Leste.
Jornalista Estaziadu : Quintão Dos Santos Tilman/Cesar Pires
Editór : Herminio Cardoso