Loluwari Média (Díli) – Komandante Jerál Polísia Nasionál Timor-Leste (PNTL), Komisariu Jerál, Henrique da Costa, hatete funsionariu ida tenta atu sunu Edifisiu PNTL Munisípiu Viqueque (MV) inklui kareta Estadu ne’ebé para iha Edifisiu laran nune’e membru polisia kaptura sidadaun ne’e lori ba Komandu MV halo prosesu investigasaun.
“Horseik akontesimentu ida iha Munisípiu Viqueque mais ou menus tuku ida ho balu membru PNTL MV deskansa hela maibé ita nia sidadaun ida tama ba iha komandu ho intensaun ladiak, atu sunu kareta estadu evidensia ne’ebé para iha komandu inklui atu sunu edifisiu Komandu PNTL Munisípiu Viqueque (MV).” Dehan. Komandante Jerál PNTL, Komisariu Jerál, Henrique da Costa, ba jornalista sira iha Unidade Polísia Maritima (UPM) Largo Lecidere, Dili, Sexta (07/02).
Komisariu Jerál, hatete, aktus ne’ebé sidadaun halo ne’e konsidera krime, tanba autor ne’e kontra prosesu Kódigu penal no mos kontra lei armas branka. Iha lei 5/2017, tanba uza tudik no gas tenta atu sunu Edifisiu PNTL MV inklui kareta Estadu.
“Ita nia sidadaun ne’ebé tama ho evidensia eskeru nomos ho tudik dehan ba membru PNTL MV fatin ne’e laiha moru diak liu sunu tiha ho nune’e membru sira haree atu ba kaer nia maibé ita nia sidadaun ne’e konsege halai ho nia motor entaun ita nia membru sira ho kareta Tranzitu duni tu’ir iha estrada hafoin halo kapturasaun ho evidensia eskeru ho tudik.”
Nia dehan membru PNTL halo kapturasaun no komunika ba Prokurador no Prokurador nia orientasaun ba PNTL halo prosesu ba sidadaun refere.
“Ita nia sidadaun ne’e mos Funsionariu publiku ida tanba ne’e mak prosesu tomak ita nia parte investigasaun komandu Munisípiu Viqueque la’o hela no sei aprezenta ba Ministeriu Publiku (MP), tanba ne’e mak ami husu ba sidadaun hotu-hotu bainhira iha problema privadu ruma labele hatudu hahalok sira ne’e ba fasilidade Estadu.”
“Aktus sira ne’e ita konsidera krime tanba nia kontra prosesu Kódigu penal nomos nia kontra lei armas branka, iha lei 5/2017 no suspeitu sei iha komandu Munisipiu Viqueque. Nia familia sira mos mai husu diskulpa ba iha komandu Munisípiu Viqueque nomos membru sira dehan ami nia ema ne’e sala no la merese atu nia halo asaun ida ne’e maibé komandu MV dehan ne’e nia eru ita nia polisia nafatin aprezenta ba MP.”
Jornalista : Chay Risky