Loluwari Média (Díli) – Moris iha kapital nasaun munisipiu Díli nia tatis, iha bairru Mascarenhas, nia leet, ha’u haree inan doben, Milena Soares, hadeer husi nia toba fatin, nunka sura nia kole hodi fó domin ba nia oan sira. Milena sui nia fuuk ho hamnasa midar. Hotu tiha nia foti has budu no sona krupuk ho domin.
Bainhira rai hun mutin ba daudaun, manu fuik no manu maus sira ne’ebé rani (tuur) iha ai letan kokorek no hananu no agardese ba Moris nia Na’in. Loromatan hadeer sui nia fuuk kabeer, hanesan feto kmook ida, leno nia roman nabilan ba ra-rai.
Hodi nia liman badinas koa has no sona krupuk ho modelu oioin. Ho neon badaen no liman badinas, nia sona krupuk no budu has toples rua tolu nakonu iha kalan ida, kalan ba kalan nia sempre sona krupuk no budu has.
Loromatan sa’e daudaun, inan doben, Milena Soares, mós haloot has budu no krupuk iha toples rua tolu ho intensaun ida de’it. Nia tutur toples ne’e iha nia ulun, lori la’o haleu sidade Dili, hodi buka do’it metan ida atu hatutan ninia moris. Milena sai husi ninia baraka iha Mascarenhas, hodi la’o haleu sidade Dili.
“Has budu, has budu, hola has budu, hola has budu.” Milena hakilar tutu’ir dalan hodi tama sai bairru ida ba bairru seluk. Hola has budu, hola has budu. Plastiku ida kuarter de’it ($0,25).
Hanesan loromatan bee fiel ba nia roman, inan doben Milena Soares, mós fiel ba ninia prinsípiu atu hadau no hatutan ninia família nia moris. Maske dala wa’in, nia tenke kompete ho ema wain ne’ebé faan sasán hanesan ho nia. Nia basa hirus matan, ah, ida-idak buka moris atu bele moris iha sidade Dili, nia manas, be halo moris ne’e sai todan liu tán.
Inan doben Milena Soares haktu’ir, lor-loron nia tenke tutur has budu no krupuk hodi faan ba ema atu hetan osan hodi sustenta nia uma laran tanba laiha servisu ruma ne’ebé nia atu halo.
“Ha’u hanesan inan ida, ha’u sente triste tanba ha’u nia laen kaben nia kondisaun saúde la permite (moras) hela nune’e hodi ajuda ami nia uma laran, tanba ne’e ha’u deside ha’u nia an hodi empresta ema nia osan sosa has no krupuk hodi faan haleu sidade Dili, be furak hanesan feto kmo’ok ida ne’ebé ema hotu nadodon hodi hadau nia moris iha sidade Dili.” Dehan Milena Soares, ba loluwari.tl, iha Palásiu do Governu, Dili, Domingu (09/02).
Milena informa, lorloron nia sempre tutur has no krupuk hodi la’o haleu sidade Dili tanba tutur moris la fasil hanesan tutur Has no Krupuk hodi haleu sidade Dili ne’ebé manas halo moris ne’e todan liu tan.
“Atu hatutan ha’u nia familia nia moris ha’u tenke kompete ho ema seluk tanba ema seluk mos hakarak hadau nia moris hanesan ha’u iha sidade Dili.”
Milena relata iha oan na’in ualu (8) kompostu husi feto na’in rua (2) no Mane nain neen (6) maibé ho Maromak nia planu nia la espera nia oan mane na’in rua fila hikas ba Aman Maromak nia kadunan santu daudaun ne’e hela na’in neen.
“Ha’u iha oan na’in 8 feto 2 mane na’in 6 maibé na’in rua fila hikas ba Aman Maromak nia kadunan santu ohin loron ha’u nia oan nain neen mak hamutuk ho ha’u, no ha’u nia laen kaben.”
Loron ba loron nia sempre faan has budu no Kerupuk hodi la’o haleu sidade Dili atu hetan osan (do’it metan) nia la’o be lao faan be faan hodi hakilar tutir dalan has budu,has budu plastik ida kuarter ($ 0,25) de’it krupuk, krupuk plastiku ida kuarter ($ 0’25) de’it.
“Ha’u dalaruma faan sasan la folin dalabarak ema ajuda ha’u hodi sosa fos ba ha’u, ha’u ho laran triste ho moris ida ne’e maibé ha’u prontu simu ho liman 2 se bainhira ha’u la halo, se mak atu haree ha’u nia oan sira.” Ho matan wen nia haktu’ir.
Jornalista : Chay Risky