Loluwari Média (Lautém) – Ministru Petróleo no Rekursu Minerais (MPRM), Francisco da Costa Monteiro, agradese ba Empreza Singapore Investment And Construction-SIIC Unipessoal, Lda. hetan lisensa atu halo peskiza minerais non-metáliku kalkáriu ne’ebé mak utiliza produsaun simenti iha aldeia Soiquili, Iparira, Lai-ara, Ira-ara, Suku Parlamento Munisipio Lautém.
“Primeiru hakarak kongratula maibé apresia no agradese ba Singapore The National Investment Coorporation Group (SIIC), ita kongratula tanba, sira hetan ona lisensa. Ita kontente tanba señor sira ne’e lalika do’ok, sira iha Singapore hili Timor-Leste, atu halo investimentu liliu sira hili suku Parlamento atu halo investimento,” Dehan MPRM, ba jornalista sira, iha suku Parlamento Tersa.
Governante ne’e hatete, IX governu lideradu husi primeiru ministru Kay Rala Xanana Gusmão, iha mandatu tinan lima nia laran ne’e atu akresenta ba dezenvolvimentu hodi fo servisu ba joven sira.
“Ida ne’e faz parte programa no politika ne’ebé IX governu Konstituisional lideradu husi, maun bo’ot Kay Rala Xanana Gusmão, Atu akresenta tinan lima oin mai ita nia dezenvolvimentu tanba ne’e importante tebes.
“Agora ba oin ita nia nesesidade atu fo servisu ba ita nia joven sira hodi hadia ekonomia povu no nasaun,” nia afirma.
Vise Primeiru Ministru no Ministru Koordenador dos Assuntos Sociais Ministru Dezenvolvimentu Rural Habitasaun Komunitária (MDRHC), Mariano Assanami Sabino, hatete, atribuisaun lisensa prospesaun no peskiza ba minerais non-metálikus iha suku Parlamento munisipiu Lautém.
Assanami husu komunidade munisipiu Lautém, agradese ba Maromak no matebian sira atu ajuda loke dalan halo investimentu rikuso’in bele hatudu-an atu dezenvolve munisipiu Lautém, suku identifikadu.
“Primeiru ita agradese ba Maromak, no avó no pai sira tanba rikuso’in sira ne’e Maromak mak fo, ita nia avó, apa sira no ita nia lulik sira mak fo, tanba ne’e ita tenke ko’alia ho sira atu riku-soin sira ne’ebé bele iha, kuandu uluk ema aat sira sei iha ne’e rikuso’in la hatudu aan.”
Tanba ita ukun aan hamri’ik mesak ona ita nia ema sira barak mak mate, matenek sira barak mak mate tanba ne’e ita tenke dezenvolve ita nia nasaun ho responsabiliza rikusoin ne’ebé.”
“Ita ukun-an hamri’ik mesak ona pillar tolu mak importante liu atu lori ita nia nasaun ba oin. fundamentu no importante liu mak rekursu petróleo ho rekursu minerais, mina ida iha tasi okos no iha rai leten no ida seluk mak osan-mean no osan-mutin no simenti sira ne’e. Pillar segundu mak turizmu. Potensia turizmu ne’e komesa iha Lautém, Díli, Ramelau to’o iha foho Matebian.
Maibé ita tenke hatene faan, Ita tenke hatene halo promosaun tanba ne’e turizmu potensia liu, iha Lautém. Area protejida ne’ebé bo’ot liu ita tenke kuidadu. Potensia ida mak agrikultura, peskas, pekúaria no floresta.” Assanami esplika.
Prezidente Autoridade Munisipiu, Lautém, Melio de Jesus, hatete, munisipiu Lautém marka istória foun, iha 26 Marsu 2024, tinan ida liu ba primeiru ministru partisipa iha lansamentu primeiru mineiru non-metáliku, mapamentu hatudu area Barikafa, Serelau, Daudere, Ililai Laivai.
Nu’udar autoridade munisipiu Lautém, espesial inan-aman, joven, ferik, katuas, veteran/a familia martires postu Lautém no Lospalos atu simu dezenvolvimentu iha munisipiu Lautém.
“Ha’u sempre ko’alia nu’udar imi nia atan presidente autoridade ha’u lakohi iha hau nia mandatu atu ita impede dezenvolvimentu iha munisipiu Lautém.
Jornalista: Nono/Resy