Loluwari Média (Díli) – Xefe Relasaun Externa Autoridade Protesaun Sivil (APC), Nelson Nunes de Orleans, hatete, husi loron 10 fulan marsu tinan ne’e dezastre akontese iha teritóriu Timor laran tomak hamutuk hamutuk 17 ne’ebé APC rejista.
“Tipu dezastre ne’ebé akontese mak anin bo’ot no rai halai, anin bo’ot estraga komunidade nia uma, ne’ebé ami rejista hamutuk sanulu resin lima (15) no rai halai estraga komunidade nia uma rua (2).” Dehan Xefe Relasaun Externa APC, Nelson Nunes de Orleans, ba jornalista sira, iha Edifisiu APC, Kaikoli, Dili, Segunda (17/03).
Nia hatete, marsu APC rejista kazu dezastre Naturais hamutuk 17 kompostu husi Anin bo’ot sobu komunidade nia uma no no mos rai halai estraga komunidade nia uma.
“Komunidade nia uma afetadu ne’ebé ami rejista, hamutuk neen nulu (60) no ami halo evakuasaun hamutuk sanulu resin tolu (13) komunidade nia uma ne’ebé hetan dezastre hodi priense kriteria hamutuk sanulu resin neen (16).” Nia afirma.
Iha munisípiu Baucau anin sobu komunidade nia uma sanulu resin ida (11) no ahi han uma ida, iha munisípiu Bobonaro, rai halai estraga komunidade nia uma ida, iha munisípiu Ermera. Anin sobu komunidade nia uma tolu (3) no rai halai estraga komunidade nia uma ida, iha munisípiu Viqueque anin sobu komunidade nia uma ida. Nia relata.
“Husi dezastre ne’ebé akontese, ami halo kedas apoiu emerzénsia ba ita nia vitima sira, iha fulan Abril, ami sei halo rekooperasaun ba komunidade uma hamutuk 97 ne’ebé hetan dezastre Naturais iha munisípiu 12 la inklui munisípiu Ermera ho Manatuto.”
Tu’ir lei APC, komunidade sira ne’ebé atu hetan rekooperasaun tenke tu’ir nia estandarnizasaun no prosesu verifikasaun. Maske nune’e APC la la’o mesak maibé ho Autoridade lokál tanba sira mak besik liu komunidade. Nia explika,
Jornalista : Chay Risky