Loluwari Média (Manatuto) – Prezidente Repúblika (PR), José Ramos-Horta no Embaxadór Japaun Tetsuya Kimura, inaugura edifísiu Eskola EBCC Nossa Senhora Aitara iha Aldeia Manlala Postu Administrativu Laklubar Munisípiu Manatuto.
“Eventu ne’ebé organiza husi Organizasaun Nãun Governamental (ONG) lokál Fundasaun Leobalu hodi halibur ofisiál lokál sira inklui Prezidente Autoridade Munisipál Manatuto, hamutuk ho profesór no estudante sira husi eskola ne’e.
“Ha’u sempre apoiu setór edukasaun tanba setór Edukasaun importante la halimar.” Dehan Prezidente Repúblika (PR), José Ramos-Horta, ba jornalista sira, hafoin Inaugura Eskola Foun iha postu Soibada munisipiu Manatuto, kuarta (02/04).
Ramos hatete, apoiu setor Edukasaun importante nune’e estudante bele aprende ho diak tanba estudante sira mak futuru nasaun.
“Ita nia dezafiu ba setór Edukasaun ne’e bo’ot iha tinan hira nia laran no ita la rezolve problema labarik sira nia futuru agora mak ba oin ita nia Edukasaun sei falla bo’ot.”
Projetu ne’e finansia husi Japaun nia eskema Projetu Baze no Seguransa humanu (GGP) ho kontribuisaun hamutuk $ 92,590.00 fasilidade ne’ebé foin hari’i ne’e iha sala tolu no sala profesór ida, ne’ebé fornese fasilidade edukasionál ne’ebé hadi’a ona ba estudante na’in 102 no profesór na’in 13 iha Eskola Nossa Senhora Aitara.”
Embaxadór Japaun Kimura, orgullu inaugura hamutuk ho Prezidente Republika, Ramos-Horta no komunidade.Nia esperansa “eskola ida-ne’e sei sai fatin ba mehi no aspirasaun ba estudante sira, hodi fó opurtunidade ba sira atu foti sira nia pasu dahuluk sira ba sira nia futuru ne’ebé nabilan.”
Projetu ida-ne’e marka implementasaun ba dala 141 tu’ir eskema GGP Japaun nian iha Timor-Leste dezde inísiu iha 2000. Programa ne’e apoia ona dezenvolvimentu infra-estrutura komunitária iha munisípiu 13 hotu iha Timor-Leste, inklui konstrusaun no rehabilitasaun ba fasilidade eskola, postu saúde sira, no sistema fornesimentu bee moos hodi hatán ba nesesidade báziku oioin humanu nian iha baze.
Jornalista : Chay Risky