Loluwari Média (Lautém) – xefe suku Serelau, Jeremias Souza, informa, estrada ne’ebe liga ba suku Serelau, Baduro to’o Mahina II kontinua grave tanba iha tempu udan kareta no motor susar atu hala’o viajen liu estrada refere.
“Ita nia estrada ne’ebé mak liga husi Serelau, Baduro, Mahina II, inklui Mahina I ne’ebé mak durante ne’e aat teb-tebes bainhira iha tempu udan ita nia komunidade sira ne’ebé mak asesu estrada ne’e susar, tanba dala ruma kareta ruma viajen ba mai ladiak”. Dehan xefe suku Serelau, Jeremias Souza, ba loluwari.tl iha suku Serelau sexta (18/04).
“Ho ida ne’e mak ami xefe suku na’in 4 inklui xefe suku Mahina I, halo ona proposta ida ne’ebé ami dirije ba ministru Obras Publiku iha tinan kotuk liu ba iha 2024 maibé ninia rezultadu ne’e mak seidauk hatene maibé konforme informasaun husi obras publiku katak sira sei iha prosesu, parese tinan oin atu halo.
Nia subliña, representante komunidade suku iha area remotas nafatin ejize ba governu liliu ministeriu relevante sira nune’e bele tau atensaun ba preokupasaun hirak ne’e liliu estrada, ne’ebé liga suku Serelau, Baduro no Mahina II.
“Depois la’os ida ne’e de’it tanba ita nia area ida ne’e liliu alto Laleno ne’e mos parte istóriku ba ita nia nasaun ida ne’e istóriku ba ita nia funu na’in sira haree ba maun bo’ot Xanana Gusmão mos uluk liliu iha Watapala mak foin reorganiza ita nia funu ho ida ne’e mak husu ba ministeriu obras publiku atu bele haree mos ami nia Estrada”. Jeremias argumenta.
Representante juventude aldeia Ra’ano, suku Serelau, Apolinario dos Santos, sente triste tanba haree kondisaun estrada husi Serelau ba to’o iha Mahina II tinan barak ona kondisaun estrada kontinua grave halo komunidade suku Serelau difisil lori sira produtu lokal ba merkadu.
“Estrada ne’e sei aat liu tan tanba udan bei-beik kareta balu mak sa’e subida mos labele, tahu dodok, fatuk bobot sira mak iha estrada laran halo ema ne’ebé ho motor sira viajen ne’e dala barak monu.”
Apolinario husu MOP atu bele hadia lalais estrada nune’e hafasil komunidade sira atu lori sira nia produtu lokal ba merkadu.
Jornalista: Nono