Loluwari Média (Díli) – Prezidente Repúblika (PR), José Ramos- Horta, hato’o ninia kondolénsia ne’ebé kle’an liu ba Majestade Sultaun Ibrahim, Liurai Maláysia, Família Real, governu, no povu Maláysia hafoin falecimentu husi eis Primeiru-Ministru (PM) Tun Abdullah Ahmad Badawi.
Sentimentu sentidu kondolensia ne’e xefe estadu hato’o liuhusi karta ofisiál kondolénsia ne’ebé entrega ba Majestade iha loron 15 Abril, 2025. Prezidente Ramos-Horta fó onra ba legadu ba eis primeiru ministru (PM) ne’ebé lidera estadu monarkia Malaysia husi 2003 to’o 2009.
“Ami sei hanoin nafatin ho admirasaun legadu husi matebian Tun Abdullah Ahmad Badawi estadista ho serenidade, integridade, no kompaixaun, ne’ebé dedika nia moris ba servisu no bem estar husi nia Nasaun. Durante nia mandatu nu’udar Primeiru-Ministru husi 2003 to’o 2009, nia lidera Maláysia ho matenek no moderasaun, promove estabilidade, dezenvolvimentu ekonómiku, no koezaun sosiál, enkuantu promove vizaun husi Islám ne’ebé progresivu no tolerante. Ninia lideransa inspiradór mós kontribui ba hametin kooperasaun no amizade iha ASEAN, valór sira ne’ebé Timor-Leste fahe no sei kontinua tane aas.” Prezidente Repúblika (PR), José Ramos-Horta, nia karta ofisiál iha Palásiu Prezidensiál Bairro-Pité Díli, Kuarta (16/04).
Iha nia karta ofisiál kondolénsia nian ne’ebé entrega ba Sua Majestade iha loron 15 Abril, 2025, Xefe Estadu Ramos-Horta fó onra ba legadu husi eis-líder Maláysia nian ne’ebé hala’o knaar nu’udar Primeiru-Ministru husi 2003 to’o 2009.
“Ha’u espresa esperansa katak memória Tun Abdullah Ahmad Badawi kontinua sai fonte inspirasaun ba jerasaun futura iha Maláysia no Sudeste Aziátiku.”
“Timor-Leste no Maláysia iha relasaun bilaterál forte ne’ebé hari’i iha respeitu no kooperasaun mútua, ho nasaun rua ne’e servisu hamutuk iha inisiativa rejionál oioin.”
Jornalista : Chay Risky