Loluwari Média (Lautém) – xefe suku Serelau, Jeremias Souza, hala’o ona nia mandatu dutante tinan rua, preokupasaun komunidade husu irigasaun natar iha Serelau tanba natar hektares 100 mak komunidade abandona iha tinan barak nia laran.
“Ha’u hakarak hato’o ba ministeriu agrikultura, tanba durante ne’e governu nia planu atu hasa’e ita nia produtu lokal liliu hasa’e ita nia kresimentu ekonómia liuhusi agrikultura maibé durante iha ha’u nia mandatu atu ba tinan rua ona ha’u observa katak iha suku Serelau area produtivu natar ne’ebé luan teb-tebes 100 hektares abandona maibé kuaze 50 hektares mak utiliza ona hodi halo natar,” Dehan xefe suku Serelau, Jeremias Souza, ba loluwari.tl, iha Serelau, Sexta (18/04).
“Maibé sira seluk abandona tanba ita nia irigasaun balu aat ona. Tanba ne’e mak ha’u husu ba ministeriu agrikultura atu bele haree, iha tempu badak ha’u sei halo proposta ida ba ministeriu relevante presiza mos sira nia tekniku atu bele mai haree ita nia agrikultor sira atu bele hatene sira nia preokupasaun.
Agrikultór suku Serelau, Jose Alexandre, afirma, durante tempu ukun aan to’o ohin loron sira nia natar abandona, kuaze hektares 50 tanba laiha trator hodi fila rai no irigasaun ladiak, udan halo rai monu bee la tama ba natar.
“Durante ne’e ami la uza trator maibé lori karau hodi halo natar, maibé agradese tanba foin daudauk ami uza hela trator privadu ida mak ajuda ona ami halai natar.” Jose hatete.
Agrikultor ne’e husu ba ministeriu agrikultura atu hadia irigasaun no apoiu trator nune’e sira labele abandona natar hodi hasa’e produsaun iha rai laran.
“Ami hakarak ministeriu agrikultura ajuda hadia lalais ami nia irigasaun no ajuda mos trator atu ami bele halai natar.”
Jornalista: Nono