Loluwari Média (Hera) – Prezidente Repúblika (PR), José Ramos-Horta, husu Universidade Nasionál Timor Lorosa’e (UNTL) hala’o kooperasaun ho Universidade Nusa Tengara Timur (NTT) atu diskute planu hari’I universidade iha zona fronteira.
“Ha’u nia mensagen mak uluk inaugura Eskola Politeknik Hera ne’e ha’u dehan tenke buka atu hametin kooperasaun ho Indonésia em partikular propinsi NTT ne’ebé ita sadere fronteira ba malu.” Dehan Prezidente Repúblika (PR), José Ramos-Horta, ba jornalista sira iha Politeknika Hera, kuarta (07/04).
PR hatete, UNTL-Universidade NTT tenke tau hanoin hamutuk atu hari’i Universidade tekniku ida iha zona fronteira hodi hametin relasaun bilaterál no kooperasaun entre Timor-Leste ho Indonésia.
“Ho buat ne’ebé ha’u buka tenke implementa bainhira ha’u ba Jakarta ho Prezidente Repúblika Indonésia Joko Widodo iha 2022 ami ko’alia kedas atu aumenta relasaun NTT ho Timor-Leste nia kooperasaun.”
Iha momentu ne’eba Prezidente Repúblika Indonésia Joko Widodo propoin idea parke industrial ida iha Timor-Leste besik fronteira no investedor sira husi Indonésia.
“Ami ko’alia mos kona-ba zona komersiu livre entre Rejiaun Administrativa Espesial Oe-Cussi Ambeno (RAEOA) ho NTT. Bainhira ha’u ba NTT ha’u sempre buka oinsa ita nia relasaun ne’e, tanba ita nia povu rihun ba rihun la hein governu, povu Timor kuaze 100 mill kada fulan atravesa fronteira ba NTT ho livre tanba ne’e ita tenke hadia kooperasaun no hodi hametin ita nia kooperasaun.”
Bainhira Prezidente Repúblika Indonésia Joko Widodo dehan atu hari’i Universidade tekniku ida iha zona fronteira tanba ne’e mak PR husu ba akademika UNTL nian atu tau hanoin hodi halo mudansa no husu governu atu apoiu hari’i Universidade tekniku ida iha zona fronteira nian.
“Tanba ne’e mak ha’u husu ba UNTL ho Universidade NTT mak tau ideia hamutuk hodi aprezenta ba projetu formal ida ba governu rua entre TL ho Indonésia atu nune’e Timor tau fundus hira no mos Indonésia mos tau nia fundus hanesan atu hari’i Universidade ida iha fronteira ho kampus ne’e iha ita nia rai no mos rai viziñu Indonézia.”
Bainhira Timor-Leste ho Indonésia hari’i Universidade iha fronteira signifika nasaun rua ne’e iha nia atraksi international tanba nasaun Indonésia país ida ne’ebé importante tebes atu nune’e governu sentral bele apoiu no governu TL mos bele apoiu malu hodi prepara joven sira ba futuru rai ne’e nian.
“Ha’u husu UNTL ho Universidade NTT atu diskute didiak planu prioridade atu hari’i Universidade iha fronteira ne’e tanba edukasaun ne’e importante tebes. Tanba edukasaun agora sai dezafiu bo’ot ba mundu.” Horta argumenta.
Jornalista : Chay Risky