Loluwari Média (Lautém) – Prezidente Komisaun organizadora, Celestino dos Santos Eloy, informa, Ministeriu Juventude Desportu Arte no Kultura (MJDAC) aloka orsamentu ho montante dollar amerikanu rihun tolu atus lima ba postu administrativu Lautem ($ 3.500.00) atu atende jogu komunitaria entre suku ho suku hodi bele anima komunidade sira iha postu Lautém hodi komemora 20 de Maiu ba dala 23.
“Tu’ir planu ne’ebé mak ita iha informasaun husi sub-komisaun jogu amizade komunitária, ne’e mak osan rihun tolu atus lima (3.500) dolar amerikanu. Modalidade ne’ebé mak atravez komemorasaun loron restaurasaun independensia ba dala 23 ne’ebé mak husi MJDAC realiza jogus komunitáriu iha postu Lautém. Ida ne’e mak hanesan ohin ha’u mensiona katak, modalidade 4 ne’e primeiru mak jogu futsal mane, depois jogu volleyball feto no mane no ba iha modalidade ida mak halai marathona ne’e no ida fali mak tiru kalik, tanba ne’e modalidade rua mak ita realiza dadauk ona hanesan jogu futsal no volleyball ho modalidade sira ne’e iha 20 de Maiu mak final,” dehan prezidente komisaun organizadora, Celestino dos Santos Eloy, ba loluwari.tl iha Lautém, segunda (12/05).
Celestino haktuir, orsamentu ne’ebé MJDAC aloka komisaun organizadora jere ba jogu komunitaria kompostu husi premiu ba vensedor sira hanesan primeiru lugar, segundu lugar no terseiru lugar ba modalidade hotu.
Prezidente KO esplika, KO seidauk konfirma loloos ba komisaun ho nune’e manan na’in sira seidauk hatene kada modalidade nia orsamentu ba primeiru lugar, segundu lugar no terseriu lugar.
“Montante mak ha’u labele dekor tanba montante momentu ne’e bainhira ami tuur hamutuk deside mas foin lalais orsamentu ne’e la aprova orsamentu ne’e ki’ik sira mai hatún mas ha’u seidauk bele konfirma loloos kada modalidade orsida primeiru lugar, segundu lugar atu hetan hira hau seidauk bele hatene.
Pontu fokal MJDAC Postu Lautém Agueda dos Santos, hatete, orsamentu ne’ebé mak MJDAC aloka ba postu administrative Lautem hamutuk $ 3.500.00 atu realiza atividade jogu desportiva komunitaria.
“Kona-ba modalidade hamutuk 4, foin lalais husi komisaun halo proposta ba MJDAC husu modalidade 5 maibé bainhira aprovasaun husi proposta ida ne’e MJDAC aprova de’it modalidade 4 mak Voleyball, futsal, halai marathona no mós jogu tradisional kalik. Modalidade rua ne’e komisaun planu dia 17 ou dia 18 fulan maiu ne’e tanba dia 19 de maiu jogus finais futsall ho voleyball nian,” Aquida esplika.
Jornalista: Nono