Loluwari Média (Atsabe) – Prezidensia Republika (PR) liuhusi Diresaun Servisu Sosiedade Sivil no Asuntu Sosial Oferese uma dignu ida ba Tiu Paulo Gomes ho Espoza Aliana Gomes ho Oan na’in 6 iha suku Salaun Aldei,Taiubu, postu admistrativu Atsabe, munisipiu Ermera.
Tu’ir Kordenadora Diresaun Servisu Sosial no Assuntu Sosial, Teresa dos Santos Ximenes, objetivu ba lansamentu uma ne’e tanba iha momentu balu liu ba observa direita husi Assesor Servisu Sosial Asuntu Sosial (SSAS) ho ekipa tun direita hodi observa kondisaun uma familia ida ne’e nian nune’e xefe suku Lasaun halo proposta haruka ba Prezidente Republika hodi prosesu hotu la’o to’o ohin loron SSAS mai halo lansamentu iha fatin ne’e.
“Ohin ita halo lansamentu ba primeiru pedra, akompaña ho admistrador postu admistrativu Atsabe no Xefe suku Lasaun no autoridade lokal, familia Vulneravel sira hotu nune’e ita entrega ba Autoridade postu no suku sira atu akompaña prosesu konstrusaun Uma ne’e to’o durasaun fulan tolu bele finaliza ona.” Dehan Koordenadora Diresaun Servisu Sosial no Assuntu Sosial, Teresa dos Santos Ximenes, ba jornalista sira iha Atsabe, kinta (05/06).
Nia hatete, apoiu hirak ne’e inisiativa Prezidente Republika atu fahe Domin ba familia difisiente no Vulneravel sira ne’ebé mak presiza ema hotu nia apoiu.
“Uma ne’ebé exelensia Prezidente Republika (PR), José Ramos-Horta, oferese ba ita nia familia vulneravel ho medida 8×7, iha hari’is fatin no dapur ho durasaun ba konstrusaun uma refere durante fulan tolu termina ona.”
Hafoin lansamentu uma ne’e, familia vulneravel, Paul Gomes, ho nia espoza Aliana Gomes inklui ho oan sira hato’o sira nia agradesimentu ba PR ne’ebé bele oferese uma ida ba sira hodi hela.
“Ha’u agradese ba avo Ramos fo ona uma mahon ida ne’e mai ha’u uluk ha’u hela de’it iha fatuk kuak agora ha’u bele iha mudansa bainhira konstrusaun uma ne’e remata hodi entrega mai ami hodi hela.”
Admistrador postu admistrativu Atsabe, agradese ba xefe estadu Tanba ho laran luak bele fo apoiu no konstrui ona uma medida 8×7 ba familia vulneravel ne’e.
“Ita hotu hatene Señor Paulo ho familia ida ne’e durante ne’e hela duni iha fatuk kuak durante tinan barak nia laran iha udan laran hanesan autoridade postu ha’u sente triste bainhira ita nia komunidade sei hela iha fatuk kuak maibé ho esforsu autoridade lokal sira nian to’o ohin loron ita nia sua exelensia Prezidente Republika liuhusi Servisu Sosial Asuntu Sosial bele apoiu mai familia vulneravel ida ne’e ami nia agradesementu klean ba nai PR no mos Assesor SSAS nia esforsu tomak.”
Xefe suku Lasaun Abrão da Conçeição hato’o nia agradesementu ba PR nia inisiativa no karitativa hodi fo apoiu ba nia komunidade ida ne’ebé durante ne’e hela de’it iha Fatuk kuak.
“Ha’u nia agradesementu bo’ot ba nai Prezidente Republika no mos ba Assesor Diresaun Servisu Sosial no Assuntu Sosial nian ne’ebé ho esforsu tomak mai direita iha ami nia fatin hodi haree komunidade Vulneravel nia moris hodi oferese duni uma dignu ho medida 8×7 ba familia vulneravel ne’ebé durante ne’e hela de’it iha fatuk kuak, ami espera katak nai Prezidente Republika sei apoiu mos ba familia vulneravel no mos difisiente sira seluk ne’ebé seidauk hetan apoiu.”
Jornalista : Chay Risky