Loluwari Média (Dili) – Amu kapelaun Fundasaun Crital, Manuel Pinto,SDB, durante prezide Misa 41 aniversariu Fundasaun Cristal iha nia homilia, fo Parabens ba Fundasaun Institutu Cristal ne’ebé selebra aniversariu ba dala 41.
“Ita agradese ba Maromak tanba grasa ne’ebé Na’i Maromak fo liuhusi fundador na’in 10 ne’ebé hari’i Fundasaun Institutu Cristal to’o ohin loron hala’o nia aniversariu ba dala 41.” Dehan Amu kapelaun SDB, Manuel Pinto, SDB, nia homilia iha selebrasaun aniversariu Fundasaun Institutu Cristal ba dala 41 iha Cristal Balide, Dili, kinta (05/06).
Amu kapelaun dehan Fundador na’in 10 ne’ebé uluk hari’i Fundasaun Institutu Cristal ne’e hasoru dezafiu bo’ot no difikuldade oioin maibé grasa Maromak nian sira ultrapasa dezafiu bo’ot ohin loron Fundasaun Institutu Cristal sai bo’ot liu tan no sai edukasaun ida ne’ebé diak ba Timor oan hotu.
“Ha’u espresa fundador sira hahu ho dezafiu oi-oin maibé ho grasa Maromak nian ohin loron Fundasaun Institutu Cristal sai bo’ot no kualidade ba Timor oan hotu tanba Instituisaun Cristal hanesan Familia ida ne’ebé ho fuan ho domin tomak tanba buat ne’ebé ita halo ba interese ema barak nian ba joven timor oan nian futuru mak nai Maromak sei la taka matan no haraik nia kriatura tomak ho grasa bo’ot ohin loron Fundasaun Institutu Cristal hamri’ik tinan 41 ona.”
Fundador na’in sanulu (10) husi Antigos Alunos Dom Bosco nian moris ho kolaborasaun ajuda malu, transparensia nia laran hodi servisu hamutuk ohin loron sira hari’i FIC ne’ebé diak ba Timor oan nia futuru.
“Ita iha espiritu familia ida ba Fundasaun ohin loron iha susesu no iha dezafiu oi-oin maibé ho ita nia fiar ba Maromak ita nia korajen iha nai Maromak mak nai Maromak fo nia grasa wa’in ba ita atu bele hari’i buat ida ba ita nia rain no ba ita nia povu.”
Buat hotu importante mak ema hotu nia servisu hamutuk ho domin korajen husi Maromak mak sira bele hari’i familia FIC.
“Fundasaun Institutu Cristal nia moris sempre hasoru anin fuik no laloran bo’ot no ita simu kritika no ameasa oi-oin maibé ita ho fuan mos ohin loron ita hamri’ik metin iha komunidade nia le’et tanba ita halo buat ne’ebé diak ba rai ida ne’e mak ita nia konfiansa iha nai Maromak boot tebes.”
“Ohin loron kualidade edukasaun FIC tenke iha kolaborasaun ho governu liu husi Ministeriu Edukasaun atu nune’e FIC nia kualidade ne’ebé diak ba jovens sira no mos ba Timor oan sira hotu tanba joven mak futuru.
“Jesus fo hanoin mai ita katak ita nia objetivu mak lalehan tanba ne’e ita hala’o ita nia moris ho diak ho espiritu Santu tanba lalehan laos tau iha bandeza fo ba Maromak tanba ne’e mak ita ida-idak hala’o nia knaar iha mundu ne’e mak edukasaun tanba ne’e ita eduka ita nia oan sira atu sai futuru nasaun ne’e nian tanba ne’e ita nafatin fo ita nia domin ba ita nia oan sira atu sai sarani ne’ebé diak no sidadaun ne’ebé diak ba rai ida ne’e.
Jornalista : Chay Risky