Loluwari Média (Bobonaro) – Prezidensia Republika (PR) liuhusi Diresaun Servisu Sosiedade Sivil no Asuntu Sosial Oferese uma dignu ba Oan Kiak Na’in Ha’at (4) iha suku Lourba, aldeia Gumer, postu admistrativu Bobonaro munisipiu Bobonaro.
Kordenadora Diresaun Servisu Sosial no Assuntu Sosial, Teresa dos Santos Ximenes, informa, objetivu lansamentu uma ne’e tanba iha momentu balu liu ba observa direita husi Assesor SSAS ho ekipa tun direita hodi survei ba kondisaun Oan Kiak Na’in Haat ne’ebé nia inan-aman mate ona hela oan kiak tanba ne’e Xefe suku Lourba, Lino da Cruz, halo proposta haruka ba Prezidente Republika no PR apoiu duni ohin loron halo lansamentu primeira pedra iha fatin ne’e.
“Ohin halo de’it lansamentu ba primeiru pedra, akompaña ho administrador postu administrativu Bobonaro, no Xefe suku Lourba no autoridade lokal no mos oan kiak sira hotu no kontrusaun ne’e ita entrega ba Autoridade postu no suku sira atu akompaña prosesu konstrusaun uma refere to’o termina ho durasaun fulan 3.” Dehan Koordenadora Diresaun Servisu Sosial no Assuntu Sosial, Teresa dos Santos Ximenes, ba jornalista sira iha Lourba, Tersa (10/06).
Nia hatete, apoiu hirak ne’e inisiativa PR nian atu fahe Domin ba familia difiseinte no Vulneravel sira ne’ebé mak presiza ema hotu nia tulun.
“Uma ne’ebé ita nia sua exelensia PR offerese ba oan kiak na’in haat mak hanesan Faustinho Godinho da. Costa, Francisca da Costa Guterres, Juvito Godinho da Costa no Martinho Godinho da Costa Aman Alipi Godinho matebian ona iha 2017 no Inan Felicidade D.Guterres Matebian iha Tinan 2022, durante ne’e Oan Kiak na’in haat ne’e hela de’it ho familia tanba ne’e PR hari’i uma medida 8¡Á7 iha haris fatin, dapur nia durasaun ba kontrusaun durante fulan tolu.”
Hafoin lansamentu ba uma ne’e, Oan Kiak na’in haat hato’o obrigadu ba PR tanba bele halo ona uma ida ba sira durante nia inan-aman husi hela sira.
“Ami husu obrigadu ba Avo Ramos Horta tanba halo ona uma ida mai ami hafoin ami nia inan no aman husi ami oan kiak na’in haat.”
Admistrador postu admistrativu Bobonaro, Thomas Barreto Henriques, agradese ba prezidenti Republika tanba bele oferese uma ida ba oan kiak na’in haat.
“Ohin ita hotu akompaña sira na’in haat ko’alia ho matan ben tanba durante tinan hira nia laran sente nakukun maibé ho Prezidente Republika nia domin oan kiak na’in haat bele hetan naroman husi PR hanesan admistrador postu ha’u sente kontente ba apoiu hirak ne’e no hau sei rekomenda nafatin ba populsaun balu ne’ebé mak moris hanesan ho sira na’in haat atu nune’e ita nia PR bele apoiu sira hotu.”
Xefe suku Lourba, Lino da Cruz, mos agradese ba PR tanba bele ajuda oan kiak na’in haat ne’ebé sira nia inan-aman mate ona no durante ne’e sira hela ho familia.
“Ha’u haree sira nia kondisaun grave tebes entaun ho razaun hirak ne’e ha’u rasik mak halo proposta lori ba hatama iha Prezidente husu apoiu. Ohin loron ekipa husi Sosial mai lansa ona primeira pedra ona ami agradese wain ba PR.”
Jornalista : Chay Risky