Loluwari Média (Díli) – Xefe Estadu Maiór Jenerál, Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek”, hatete, iha tinan 400 liu ba tempu Portuguesa sira nunka hanorin Timor oan kona-ba lalehan no tasi ne’e Timor nian maibé ohin loron Timor, ukun an Timor mos hatene rai, tasi no lalehan prepara Timor oan atu bele kontrola.
“Bainhira ita ukun an, ita foin hatene katak espasu lalehan no tasi mos ita nian hotu, tempu Indonésia nunka mais hanorin mai ita maibé buka tempu duni ita no oinsa atu oho ita.” Dehan Xefe Estadu Maiór Jenerál, F-FDTL, Tenente Jenerál, Domingos Raul “Falur Rate Laek”, ba jornalista sira, iha Kuartel General, Fatuhada, Dili, Sexta (20/06).
Xefe Estadu Maior jeneral F-FDTL, hatete, nu’udar Timor ona orgullu ho espiritu MAUBERE ohin loron Timor-Leste, nia historia iha perante difikuldade barak maibé fo homenagen ba Heroinu no heroina martires sira nia mehi atu servi povu Timor-Leste ho diak.
“Bainhira ita servisu ba ita nia rai ho diak ho responsabilidade mak ita bele ukun husi rai to’o lalehan, hodi hala’o vizaun FDTL nian. Ita hotu nia responsabilidade nu’udar sidadaun ne’ebé komprometidu ba ita nia nasaun nia futuru tanba ne’e mak ita diskute buka dalan oioin no halibur kuñesimentu ba ita nia dezenvolvimentu.”
“Komponente Aeria Ligeira ida ne’e iha faze inisiál no iha buat barak atu halo, tanba nu’udar Timor oan hotu iha institusaun F-FDTL ida ne’e atu servisu ba mehi ida ne’ebé Heroinu no heroina sira nia mehi né’ebé mate iha batalla.”
“Ita nia forsa armada nu’udar reflesaun ida ba luta inkansavel ba Liberdade no inkansava ne’ebé ita nia beiala sira, no ita nia Guerilleiru sira personifika hodi hanorin mai ita kona-ba dever no kompromisu, reziliénsia no Determinasaun, tanba ne’e palestra ohin nu’udar kompromisu atu reflete kona-ba importansia kompromisu Aeria forsa Armada Timor-Leste nian.”
Transizaun Forsa ne’ebé koopera liliu ba rai no abranza ba lalehan mak pasu krusial ida hodi moderniza kapasidade Defeza hodi realiza misaun no vizaun estratéjiku.
“Ita nia objetivu atu asegura ita nia forsa sira atu halo preparasun hodi hatan ba dezafiu ne’ebé ita sei hasoru iha futuru, ita hotu nia mehi no esperansa bo’ot liu mak Forsa Aeria Ligeira bele hala’o nia papel ida ne’ebé importante iha sistema Defeza la’os de’it iha termu protesaun maibé mos hametin rejionál no oferese apoiu humanitariu.”
Dezenvolvimentu ba Komponente Aeria Ligeira (KAL), esensiál atu garantia estabilidade seguransa nian hodi kontribui ba paz no dezenvolvimentu iha Rejiaun TL.
Komandante Aeria Ligeira Coronel, Elder da Costa, hatete, Komponente Aeria Ligeira (KAL), ba futuru ho diak presiza ema hotu nia suporta no motivasaun.
“Ami nia Komponente Aeria Ligeira ne’e foun, ami presiza ema hotu nia ideia no suporta mai ami no ami tenta ba ema hotu atu envolve iha Aeria Ligeira nune’e Komponente Aeria Ligeira ne’e ba futuru ho diak, tanba ita nia Falintil uluk luta no fo an ba nasaun no povu ida ne’e ho dignidade tanba ne’e mak ita hari’i KAL ida ne’e hodi kompleta ita Forsa Rai, Tasi no Lalehan nian hodi kontrola ita nia soberania.”
Komponente Aeria Ligeira iha efeitu hamutuk 80 resin no Piloto iha na’in 4 ne’ebé prontu ona atu servi ba Aeria Ligeira nian iha Timor-Leste.
Jornalista : Chay Risky