Loluwari Média (Díli) – Ministru Defeza (MD), Kontra Almirante, Donaciano Costa Gomes “Pedro Klamar Fuik” fo pose ba Diretór Interinu Institutu Defeza Nasionál (IDN), Nuno Carvalho Sarmento, no Diretóra Jerál Jestaun no Rekursu, Josefa dos Reis Gonçalves, no Diretór Ensinu Formasaun Kapitaun Fragata Graduadu, Nicolau Sousa Guterres, ne’e importante tebes atu reforsa Institutu Defeza Nasionál transforma Ensinu Superiór Defeza Nasionál.
“Ohin opurtunidade importante hodi fo pose atu hetan reforsa husi membru foun ne’ebé mai reforsa IDN atu bele hala’o programa transformasaun, IDN ba Institutu Superiór Defeza Nasionál (ISDN), tanba ami nia prosesu transformasaun ba ISDN la’o hotu ona no kuadru juridiku iha ona Konsellu Ministru hein ajenda atu diskute iha Konsellu Ministru hodi hetan nia rejolusaun.” Dehan Ministru Defeza (MD), Kontra Almirante, Donaciano Costa Gomes “Pedro Klamar Fuik”, ba jornalista sira, iha Palásiu Governu, Dili, Tersa (24/06).
Governante ne’e hatete, IDN mos iha ona preparasaun Rekursu Humanu no mos ba infra-estrutura, tanba IDN nia dezenvolvimentu Nasionál ba ISDN rekere kampus ne’ebé bo’ot no foun atu bele fo formasaun diak ba futuru lideransa iha nivel hotu-hotu tantu nivel Polisial no mos ba nivel Militár inklui Sivil.
“IDN iha rekursu ne’ebé mak nesesariu atu bele sustenta sikulu lideransa iha Timor-Leste, bainhira laiha sikulu lideransa ne’ebé mak definidu no prepara diak, liuhusi IDN mak ita bele iha difikuldade ba lider ne’ebé adekuadu ba ita nia rai no fo kontinuasaun ba ita nia rai nia futuru.”
“Institutu Defeza Nasionál nia transformasaun ba Institutu Superiór Defeza Nasionál ne’e bele implementa ona instituisaun Ensinu Superiór ida ne’ebé mak bele kualifika akademika no formasaun siensia Militár, ba Militár sira no ba Polísia Nasionál Timor-Leste, no mos ba sivil sira ne’ebé iha area relevante IDN nian.
Diretór Interinu Institutu Defeza Nasionál (IDN), Nuno Corvelo Sarmento, hatete, ohin ofisialmente simu pose nu’udar Diretór Ezekutivu atu fo kontinuasaun ba programa ne’ebé mak IDN iha.
“Bainhira ha’u hala’o ha’u nia misaun importante mak ha’u nia koordenasaun ho Ministeriu Defeza nune’e bele garante IDN ne’e la’o ba oin, ha’u nia esforsu mak atu implementa programa sira ne’ebé IDN alkansa to’o ohin loron.”
“Misaun ho vizaun la’os novidades ona maibé ne’e halai liu ba area formasaun no kapasitasaun ba rekursu humanu atu iha lideransa ne’ebé diak lori Timor-Leste ba oin.
“IDN forma estatistika lubuk ida ne’ebé namkari la’os iha Instituisaun F-FDTL no PNTL de’it maibé ba Sivil sira mos iha hotu, tanba husi IDN ne’e preparasaun maximu ona hein lideransa sira atu nune’e ami bele lori IDN ba oin.”
Diretor Jeràl Jestaun no Rekursu, Josefa dos Reis, agradese tanba ohin fo pose ba Diretór IDN, tanba IDN enfrenta difikuldade no obstakulu barak maibé ho ema hotu nia suporta mak IDN sei sai mahon ba ema hotu.
“IDN hala’o nia kna’ar hodi forma ema husi entidades oioin Sivil, Militár no Polísia atu garantia estabilidade ba povu nia moris iha Timor-Leste, tanba IDN kumpri nia misaun liuhusi fornese apoiu maximu ba servisu akademia Institutu Defeza Nasionál.”
“Servisu ho leal ba Institutu ne’ebé justu no korektu ba desizaun husi Superiór liliu Diretór Ezekutivu IDN no mos Ministru Defeza.
“Ita mai ho karakteristika ne’ebé la hanesan maibé tau iha ita nia konsensia katak bainhira ita hamutuk iha Institusaun ida etika komum mak rekere ita nia komunikasaun lei no normas mak instituisaun mak regula ita nia asaun.”
Atu garante IDN ba futuru evita gastus ne’ebé la nesesariu atu nune’e prinsípiu ne’ebé transparante boa governasaun.
“Ita nia hamutuk iha Ministeriu Defeza iha tinan barak nia laran hodi fahe esperiénsia ba malu husi ne’e inspira ha’u nia karter hanesan servidor ba Estadu hodi distinge entre Estadu ho interese privadu, ha’u nia agradesimentu ba MD nia konfiansa tomak mai ha’u maibé la taka dalan bainhira iha servisu lorloron mak ha’u nia performa la tu’ir Ministru Defeza nia espetativa mak ha’u husu ba MD atu salva IDN la’os salva Diretóra Gestaun no Rekursu IDN.”
Jornalista : Chay Risky