Loluwari Media (Dili) – Presidente Asosiasaun Jornalista Timor Lorosa’e (AJTL), Gevonia Vieira, hatete, AJTL ho parseiru OXFAM Timor-Leste, Alumi Parlamentu foinsa’e Timor-Leste (APFTL), Mata Dalan Institute (MDI), Timor-Leste Organic Fertiliser (TILOFE), Ermera Ai-kulat Mutin Organiku (EAMO) no Forum Juventude Defisiensia Ermera (FJDE) lansa media Center nune’e promove foinsa’e sira iha setór produtivu.
“Ohin AJTL hamutuk ho nia parseiru sira atu lansa centru media ne’ebé liga ho hametin servisu advokasia média hodi nune’e promove foinsa’e sira iha setór produtivu sira iha timor”, dehan Prezidente AJTL, Gevonia Vieira, iha Fundasaun Haburas, Kuarta (25/06).
Setór produtivu sai fator importante iha Timor-Leste, nune’e bele halakon dependensia ba fundu petroliferu, tanba kazu Bayundang sai preokupasaun bo’ot ba Timor-Leste.
Asosiasaun Jornalista Timor Lorosa’e (AJTL), kontinua foti papel halo advokasia ho parseiru sira ne’ebé durante ne’e halo nia atividade ba setór produtivu hodi dezenvolve ekonomia iha Timor-Leste di’ak liu husi setór produtivu sira.
“AJTL kontinua foti papel halo advokasia servisu hamutuk ho ita nia parseiru sira ne’ebé mak durante ne’e halo sira nia atividade ne’ebé mak produtivu tebes atu dezenvolve ekonomia rai laran di’ak liu uza setor produtivu sira, entaun AJTL durante ne’e servisu ona Oxfam ho parseiru sira lori jornalista sira ba ona kobertura iha asuntu importante sira ne’ebé mak fo valor promove joven sira ne’ebé mak lian laiha maske sira halo sira nia servisu barak iha area rural hodi kontribui ba estadu kria servisu ba sira nia an dezenvolve sira nia uma laran no mos ativu tebes oinsá maka partisipasaun joven ne’e importante tebes iha estadu ida ne’e”.
Alende ne’e lansa ona programa sentru ba Media ne’ebé sai nu’udar fatin no mahon ba jornalista sira no ba parseiru hotu hodi halo atividade hotu liuhusi parseiru sira mak MDI, APFTL, TILOFE, EAMO no FJDE atu ajuda jornalista fahe informasaun ba governu Timor-Leste, no ba Parlamentu Nasionál hodi tau orasmentu ba setór produtivu sira iha Timor-Leste.
Diretór Mata Dalan Institute (MDI), Estevanos Coli, haktuir, Mata Dalan Institute (MDI) hola parte iha atividade husi asosiasaun Jornalista Timor Lorosa’e (AJTL) no membru AJTL sira ne’ebé divulga informasaun prosesu dezenvolvimentu iha Timor-Leste.
“Ami hola parte iha atividade sira ne’ebé mak sei halo parseiru ho kolega jornalista sira liliu membru AJTL sira atu nune’e bele halo divulgasaun ba informasaun sira ne’ebé mak relasiona ho prosesu dezenvolvimentu iha rai laran, iha atividade sira ne’ebé mak ita sei halo iha relasaun barak ho diversifikasaun ekonomia no promove joven ka foinsa’e sira nia ne’ebé mak iha abilidade iha kuñesimentu atu halo produsaun”.
Jestor MDI akresenta, produsaun sira ne’e atu ajuda sidadaun no komunidade sira iha reziliensia ba moris entermos ekonómikamente ba ai-han ne’ebé sufisiente ba sira atu bele moris (sobrevive) ba situasaun sira ne’ebé difisil.
Koordenador projetu Hakfoun husi Alumni Parlamentu Foinsa’e Timor-Leste (APFTL), Domingos Belo M. de Jesus, hatete projetu Hakfoun aproveita hametin relasaun husi grupu foinsa’e sira no membru governu sira, nune’e APFTL aproveita halo advokasia ba polítika sira husi públiku sira hodi kria servisu no apoiu sira emprendedorizmu sira.
“Husi projetu Hakfoun APFTL aproveita atu hametin grupu foinsa’e produtivu sira no membru governu sira, iha projetu Hakfoun APFTL hakarak aproveita opurtunidade ida ne’e atu halo advokasia polítika públika sira ne’ebé bele fo ba Juventude sira hodi bele kria ba komunidade servisu no mós bele fo apoiu ba emprendedorizmu”.
Alende ne’e projetu Hakfoun APFTL iha atividade 3 maibé atividade la’o ona mak kapasitasaun ba grupu koligasaun agrikultura ne’ebé hala’o iha munisípiu Ermera no RAEOA, atu grupu agrikultura bele halo intervensaun ba siklu orsamentu jerál do estadu (OGE), alende atividade 2 sei hala’o iha loron 26-27/06/2025 iha fundasaun oriente no konvida grupu sira husi munisípiu 12 inklui RAEOA.
Jornalista : Anis