Loluwari Média (Dare) – Januario Soares, informa sei hari’i uma mahon dignu ba difisiente, Adriano Melo, ne’ebé durante tinan 6 hela iha uma oan ida no toba iha hadak aat.Iha domingu 29 Juñu 2025, ekipa ida ne’ebé lidera husi Januario Soares hakat ba suku Dare, fo nia solidaridade ba Apa Adriano Melo Soares, nu’udar sentimentu humanu labele husik ema ida iha kotuk maske moris mak ketak maibé ema hotu nu’udar kriatura Maromak nian.
“Ha’u nia misaun atu fo ha’u nia solidaridade ba ita nia ema ne’ebé presiza ema hotu nia tulun, hanesan mos apa, Adriano Melo Soares, tanba ha’u lakohi ita nia ema ida sente hamlaha no iha kotuk. Maibé ita kriatura hanesan tanba ita nia avo beila sira fo rai ne’e ba ita, ita atu hamri’ik hamutuk hanesan kriatura ida deit.” Dehan Januario Soares, ba loluwari.tl iha aldeia Coalau I Suku Dare, Domingu (29/06).
Januario hatete, komunidade ne’ebé iha Sosiedade nia leet presiza haree hanesan labele haree balu iha kotuk no balu iha oin, tanba ne’e mak ohin nia lori nesesidade bazika fós, mina, supreme, Deho, masin, masako ne’e hahan ne’ebé meius importante ba ema nia vida no mos nia lori mos sprinbet, Manta Sumasu no ropa hatais inklui balde sabaun no rinso.
“Nesesidade bazika ne’e hahan alternativa ida ne’ebé ema presiza duni, tanba ita haree rasik ho matan apa, Adriano Melo Soares, nia kondisaun ne’e vulneravel, tebes la dignu no la merese. Fatin ne’e ema atu hela maibé ho Média Loluwari.tl nia kobertura mai iha Apa, Adriano Melo Soares, nia fatin hodi fo sai ohin ha’u lori nesesidade bazika mai to’o apa, Adriano, nia uma, ha’u sente triste tebes ho apa nia kondisaun ne’ebé nia hela ba ne’e la merese nia atu hela.”
Tanba kompara animal mos nia na’in sei halo nia fatin dignu ida hafoin hatama animal para isin diak hodi faan maibé apa, Adriano nu’udar humanu iha Sosiedade no iha rai doben Timor-Leste ida ne’e se bainhira ema hotu bele kalan deskansa ho diak tansa apa, Adriano Melo Soares, nafatin halerik no deskansa ho bokon tan udan no mahoven nia bokon halo nia sente tinan naruk nakukun hafalun nia.
“Ha’u sente triste tanba ita nia apa, Adriano Melo nia kondisaun Vulneravel tebes iha rai ida ne’e, maske Timor-Leste, hetan nia independénsia tinan 20 resin maibé Estadu ladauk tau matan ba ita nia komunidade sira ne’ebé iha area remotas ne’ebé oras ne’e nakukun sei hafalun sira, maibé ha’u kompromete katak ha’u sei halo mahon diak ida ba apa Adriano Melo Soares.”
Difiseinte, Adriano Melo Soares,espresa nia sentementu kontente bainhira, Januario Soares, ho laran kaman bele hakat to’o nia horik fatin hodi haree nia kondisaun moris ne’ebé nia hasoru.
“Ha’u sente kontente tebes, tanba ohin imi bele lori hahan bazika mai to’o iha ha’u nia uma ida ne’e, maske dalan nakukun mai ha’u esperansa ba ha’u folin laek atu hetan naroman maibé Maromak nunka taka matan mai ha’u ohin loron imi to’o mai iha hau nia horik fatin ha’u husu ba Maromak atu fo grasa no bensaun ba imi atu nune’e imi bele hetan isin diak hodi hala’o imi misaun ida ne’e.”
Durante ne’e Apa Adriano, Melo nia mehi mak husu ema atu halo netik mahon dignu ba nia atu nune’e nia bele hela hodi hala’o nia atividade lorloron.
Hafoin simu apoiu nesesidade bazika husi, Januario Soares apa Adriano Melo Soares, hamonu mataven tanba durante tinan barak nia laran laiha ema laran diak ida atu bele ba vizita nia no fo apoiu ba nia maibé ho prezensa Média Loluwari.tl nian ohin loron ema hatene nia hodi fo apoiu ba nia.
“Agradese tebes ba imi hotu nia apoiu maromak haraik bensaun ba imi hotu.”
Responsavel Ministeriu Solidaridade Sosial Inkluzaun (MSSI) Mikas, Filomena Fernandes Cabral, Dehan ohin Parte MSSI mai too iha Apa Adriano Melo Soares nia horik fatin tanba sira hetan proposta husi Estudante Lino Soares nomos husu Média Loluwari.tl nia publikasaun iha nia Westside ba Adriano melo Soares nia kondisaun neebe durante ne’e nia enfrenta.
“Ohin ami to’o mai iha Apa, Adriano Melo Soares, nia horik fatin tanba ne’e ami nia kna’ar nudar responsavel kona-ba Solidaridade Sosial Inkluzaun nian entaun ami mai fo apoiu osan 100 dolares no ami foti nia dadus ba ami nia lider tanba Adriano Melo nia kondisaun ril neebe agora dadaun nia enfrenta hela atu nune’e ami bele halo relatóriu kredivel katak ida ne’e los atu ami bele solusiona nia problema iha tempo badak.”
Jornalista : Chay Risky