Loluwari Média (Dare) – Catarina de Araújo, domingu ne’e fo apoiu solidaridade ba Pai Adriano Melo Soares, ho buat ne’ebé nia iha hakarak fahe mos ba ema ne’ebé presiza tanba nu’udar ema kriatura ida de’it maibé moris mak haketak malu.
“Ha’u ohin lori nesesidade bazika hahan ne’ebé ha’u hakarak oferese, hanesan domin husi ita ema ida ba ema seluk, tanba ha’u hare Média loluwari.tl, publika pai Adriano Melo Soares, nia kondisaun moris, ha’u hanesan feto ida, ha’u sente triste ho matawen tanba ne’e mak ohin ha’u hakarak mai lori hahan fahe mos ba pai Adriano hanesan ita Maromak oan.” Dehan Catarina de Araújo ba loluwari.tl iha rezidensia Adriano Melo, Coalau I, Dare, domingu (06/07).
Nia hatete, fahe buat ne’ebé nia iha ba ema ne’ebé presiza apoiu maske la barak maibé hanesan domin ida ne’ebé nia fahe ba ema ne’ebé presiza.
“Ha’u husu Pai keta hanoin barak no triste, maibé presiza kontente tanba kontente mos bele kura pai nia kondisaun moras maske moris la hanesan ema seluk ne’ebé iha família barak maibé presiza kontente atu nune’e pai hetan isin diak, saude diak, atu nune’e ami bele mai vizita nafatin pai hanesan ami nia aman.”
Molok fila, Catarina husik liamenon atu pai Adriano labele hanoin barak maibé pai kuidadu liu saude mak han hemu be barak no deskansa barak no labele haluha orasaun.
Difisiente, Adriano Melo Soares, agradese tebes ba Maromak, tanba nia kondisaun moris ho simples hela mesak durante tinan barak ho nia kondisaun saúde ladiak maibé feto dahuluk ne’ebé vizita nia no fo apoiu nesesidade bazika ba nia maske nia laiha oan feto.
“Ha’u agradese tebes ba hau nia oan feto, Maromak haraik bensaun no fo matak malirin ba nia, tanba uniku feto dahuluk mai vizita ha’u ho ha’u nia kondisaun moris ho uma at no ha’u nia kondisaun ain mos la’o ladiak maibé nia bele ohin la’o to’o mai ha’u nia horik fatin maske ha’u seidauk hola feto no seidauk iha oan feto.”
Adriano haktu’ir, durante tinan barak nia laran nia sente nakukun sempre hafalun esperansa ba nia namlaek tanba distansia mos dalaruma empata ema ida nia moris atu hetan naroman.
“Ha’u sente triste tanba tinan hira nia laran ha’u toba iha nakukun laran uma ne’ebé ha’u hela mos komesa dodok ona dala-ruma tempu udan no mahoven sempre habokon ha’u nia toba fatin maibé ha’u nafatin toba ho bokon tanba se loos mak ha’u atu husu ba nia atu bele ajuda ha’u iha tempu udan no anin ida ne’e mak ha’u nia kondisaun moris ne’ebé ha’u iha maibé Maromak fo bensaun ba ita. Tanba ohin ho laran kaman bele mai vizita ha’u iha fatin simples ida nee.”
Jornalista : Chay Risky