Loluwari Média (Batugade) – Komandante Jerál Polísia Nasionál Timor-Leste (PNTL), Komisariu Jerál, Henrique da Costa, hatete, ohin vizita supreza ba Postu Unidade Patrullamentu Fronteira (UPF), atu haree direita membru sira nia servisu iha terrenu.
“Ohin ita mai to’o iha UPF nia fatin haree ho matan katak ita nia membru sira servisu hanesan babain servisu kooperasaun ho Migrasaun, Alfandega Karantina no mos Servisu Sekreta Informasaun nian la’o ho diak tebes.” Dehan Komandante Jerál PNTL, Komisariu Jerál, Henrique da Costa, ba jornalista loluwari.tl, iha Fronteira Batugade, kinta (03/07).
Komjer hatete, durante ne’e sira servisu hamutuk ho diak tebes hodi haree ema tama sai iha Fronteira.
“Ohin ha’u mos fo hanoin ba sira atu nune’e ita nia membru UPF sira no mos Migrasaun, Alfandega, Karantina inklui Polísia tranzitu sira bele kontrola ita nia Fronteira sira ho diak. Tanba foin liu loron hira ita nia servisu informasaun Sekreta sira detekta sidadaun Indonésia ne’ebé hatama osan ho montante boot.”
“Sidadaun Indonésia ne’e lori osan tahan no osan besi dolar Amerikanu nian husi Indonésia mai Timor-Leste, tanba ne’e mak Autoridade Seguransa prosesa ona nia tuir lei.”
“Ida ne’e hanesan referensia ida mai ita, tanba ne’e ita fo hanoin ba ita nia membru sira atu bele fo atensaun maximu ba ita nia Fronteira, tanba ita mos prepara ona atu tama ba ASEAN, ita presiza kontrola ba ameasa sira ne’e no ha’u husu ba membru sira atu servisu ho kuidadu no responsabilidade.”
Postu balu membru UPF utiliza ona maibé iha laran fasilidade seidauk kompleta Komandu Jerál PNTL sei esforsu hodi fo hatene ba Ministru Interior atu nune’e nia tekniku bele mai haree hodi kompelta fasilidade sira iha postu polisia.
“Postu UPF ne’ebé ita nia ministru Interior konstrui ba UPF ne’e konstrusaun pursentu 90 (90%) ona maibé nia fasilidade balu seidauk kompleta ne’ebé Ministru interior sei haruka nia tekniku sira bele ba halo kompleta no mos ahi ne’ebé seidauk, sira bele halo kompleta hotu hodi entrega ba ita nia UPF hodi utiliza halo vizilansia ita nia Fronteira.”
Servisu importante iha fronteira mak presiza liña koordendasaun ne’ebé diak ho autoridade sira seluk ne’ebé servisu iha fronteira, nune’e sira bele hala’o sira nia kna’ar ho diak se bainhira autoridade iha fronteira mak la servisu hamutuk difisil atu kontrola Fronteira, liliu ema no sasan tama sai Fronteira nian.
Jornalista : Chay Risky