Loluwari Media (Dili) – Diretora PLAN internasional Timor-Leste, Fatima Estrela Soares, hatete, onra hamutuk fila fali iha ne’e ho atividade diferente no inspiradu ho tema loron ohin nia atu respeita fo espasu ba ema hotu.
“Loron ida ohin ne’e ita mai hamutuk hodi komemora Loron Pride no loron Nasional ba ema ho defisiensia maske liu ho atividade seluk ne’ebé mak halo liu ona. Ohin ita selebra atu fo hanoin malu nafatin ba loron importante ida ne’e no re-afirma ita nia prinsipiu ne’ebé importante tebes hodi haree katak atu ema hotu tenke hetan respeitu espasu moris ho liberdade no opurtunidade hanesan”. Dehan, Diretora PLAN internasional Timor-Leste, Fatima Estrela Soares, iha Fundasaun oriente, Segunda (21/07).
Enkuantu, iha atividade ida ne’e atu prátika hahu husi ita nia an rasik nune’e bele respeita maluk sira ne’ebé husi komunidade LGBTIQ+ no Ema ho Defisiensia (EhD) sira.
“Ohin ita hamutuk iha ne’e presija nafatin ita atu lakohi haree bebeik iha surat tahan maibé ita hakarak tau iha pratika hahu husi ita an rasik atu respeita maluk sira iha ita nia sorin-sorin liliu sira ne’ebé mai husi Komunidade LGBTQ+ no maluk sira defisiensia, feto no grupu marjiniliadu sira seluk”. nia informa.
Eventu ida ne’e hetan opurtunidade ida liuhusi projetu ne’ebé hetan fundus husi uniaun europeia (UE) ne’ebé projetu ne’e ho naran “futuru inkluzivu no seguru”.
Entretantu husi projetu ne’e Plan internasional ho komitmentu hodi kontinua implementa projetu ne’ebé husi Uniaun Europeia (UE) fo hodi haboot no prátika planu tinan lima nian atu haree direitu ba Ema ho Defisiensia (EhD) no komunidade LGBTIQ+.
“Tanba ne’e mak iha momentu ida ne’e husi plan internasional atu re-afirma ami nia komitmentu, ami sei kontinua implementa projetu ne’ebé uniaun europeia fo fundus kontinua haboot pratika diak sira.
“Ami hahu husi diskuti kontinua iha komitmentu iha tinan 5 oin mai, planu estratejia tinan 5 sei lansa iha Agustu no ami nia intervensaun bo’ot ida mak atu haree ba direitu maluk sira defisiensia no komunidade LGBTIQ+ ida ne’e tau ona ami nia komprimisiu bo’ot.
No sei servisu hamutuk ho organizasaun sira atu hamri’ik hamutuk hodi implementa lei no politika sira ne’ebé mak iha no oinsá mos haree mos area sira seluk bele apoiu komunidade LGBTIQ+ komunidade Defisiensia liuhusi servisu hamutuk ho organizasaun hotu no ami sei kaer metin atu servisu hamutuk Juventude sira.
No eventu ida ohin ita hamutuk komemora diversidade kria espasu seguru dezafia estigma no diskriminasaun nune’e ita hamutuk garantia ema hotu moris ho dignidade orgulu ho partisipasaun iha sosiedade”.
Jornalista : Anis