Loluwari Média (Díli) – Ekipa Nasionál Timor-Leste, ne’ebé kuñesidu ho naran istimadu Lafaek simu derota daruak husi nia adversariu Cabo Verde ho rezultadu 4-0.
Ho rezultadu refere Timor-Leste nia mehi atu hetan medalla bronze lakon le’et de’it iha modalidade futeból, iha jogu abertu ekipa Lafaek derota kontra Portugal ho rezultadu 1-0 ne’e lori Timor-Leste okupa posizaun ikus iha tabela klasmen.
Ekipa nasional Cabo Verde konsege halakon ekipa Timor-Leste, uma na’in ho rezultadu 4-0, rezultadu ne’e fo opurtunidade ba ekipa Caboverdiano sira mantein atu kompete to’o etapa tu’ir mai.
Jogu primeira hahu ekipa rua lansa kontra atake ba malu atu rekolla rezultadu pozitivu iha jogu tanba iha jogu dahuluk ekipa rua sofre pontu tolu husi sira nia adversariu.
Nune’e treinador sira halo orientasaun iha jogu daruak tenke rekolla pontu 3 atu kria opurtunidade ba jogu tu’ir mai maske nune’e ekipa iha opurtunidade hanesan atu manan iha jogu daruak atu fo biban ba jogu datoluk.
Ekipa uma na’in iha ambisaun makas hakarak halo moe ekipa nia adversariu Cabo Verde iha nia uma rasik ho apoiu adeptus sira, maibé mehi ne’e la sai realidade. Tanba ekipa Cabo Verde halo presaun makas no la fo opurtunidade ba jogador ekipa Lafaek atu kria opurtunidade.
Tatika treinador na’in rua halo ekipa Lafaek fo presaun makaas ba Cabo Verde atu hatudu rezultadu pozitivu hodi hetan pontu 3 ba ekipa ida-idak.
Enkuantu iha tribun adeptus sira fo apoiu makaas ba sira nia ekipa atu manan,
Ekipa nasional Cabo Verde lansa atake ne’ebé makas ho atake hirak ne’e fo kedas opurtunidade ba jogador Victor Monteiro ho numeru kamijola 15 hodi muda rezultadu provizoriu ba 1-0 iha minutu 6, rezultadu ne’e halo ekipa lafaek mos la nonok maibé buka opurtunidade atu empata jogu, maibé liu de’it minutu neen de’it jogador Cabo Verde Antonio dos Reis, ho numeru kamizola 7 konsege oferese golu daruak ba ekipa bainaka, iha minutu 12 jogu primeira parte nian provizoriu ekipa bainaka lidera 2-0.
Rezultadu ne’e halo presaun mental ba ekipa uma na’in atu halo balansu jogu nune’e ekipa uma na’in halo presaun makaas ba liña defeza ekipa bainaka maibé seidauk iha rezultadu.
Maske nune’e ekipa Lafaek kontinua lansa atake ba nia adversariu hodi hatudu jogu ne’ebé diak no fantastiku maske ekipa Lafaek foin partisipa kopa U-16 ne’e no jogador barak ladauk iha esperiénsia.
Ekipa bainaka iha 26 liuhusi nia jogador Victor Monteiro, ho numeru kamizola 15 konsege fura rede ekipa uma na’in nune’e muda rezultadu ba 3-0.
Golu datoluk ne’e hamonu ekipa uma na’in nia mentalidade monu iha nia uma rasik no la konsege hatudu jogu ne’ebé diak inklui falta kontrolu no la ezekuta opurtunidade ne’ebé diak. Rezultadu 3-0 mantein to’o jogu primeira parte termina.
Kontinuasaun jogu ba segunda parte ekipa rua mantein posizaun treinador sira mos seidauk halo mudansa tatika no seidauk halo substituisaun jogador. Ekipa uma na’in uza meius oioin atu rezulta golu ba ekipa bainaka maibé ekipa Cabo Verde mos la fo opurtunidade tanba sira fiar an hodi asegura pontu 3.
Ekipa uma na’in tenta buka meius oioin atu kria golu maibé defeza Cabo Verde sempre halo presaun iha liña defensivu halo avansadu ekipa uma na’in frustradu no falla iha finalidade. Rezultadu 3-0 mantein to’o 90 minutu jogu termina laiha tan golu ruma akontese ho provizoriu nafatin 3-0. No arbitu deside aumenta tan tempu adisional minutu 5, ekipa bainaka aproveita tempu adisional hodi habo’ot golu ida liuhusi jogador numeru kamizola 14 ba 4-0.
Jornalista : Chay Risky