Loluwari Média (Baucau) – Prezidente Partidu Kmanek Haburas Unidade Nasional Timor oan (P. KHUNTO), Armanda Berta dos Santos, husu ba estrutura Partidu KHUNTO husi Nasionál to’o baze atu servisu makaas hodi bele atinje mehi ne’ebé mak ema hotu-hotu hakarak no lori dezemvolvimentu diak ba povu.
Iha sabadu P.KHUNTO halo Reajustamentu no Tomada de posse ba estrutura foun iha postu administrativu Matebian Munisípiu Baucau no mos simu afiliasaun balu husi partidu Osverdes hakarak mai haforsa Partidu KHUNTO atu sai politika ida forsa.
Serimonia tomáda de posse ba Estrutura foun iha postu administrativu Bauquia iha Matebian partidu KHUNTO simu mos afiliasaun husi militante partidu Os Verdes.
“Ita hotu presiza servisu makaas ita hakarak manan tu’ir mehi no hakarak ne’ebé ita présiza servisu no liuhusi servisu mak bele hatudu rezultadu ne’ebé diak tanba ne’e mai ita hotu-hotu servisu hahu husi estrutura nasional tun to’o baze para bele atinji ita nia mehi ne’ebé mak ita hotu-hotu hakarak liliu ba dezenvolvimentu rai laran no ita nia postu administrativu sira.” Dehan Prezidente Partidu KHUNTO, Armanda Berta dos Santos ba Militantes sira iha Postu Matebian (16/08).
Eis vise primeira Ministra oitvu governu ne’e enkoraja estrutura sira katak fiar iha kapaside ne’ebé mak iha, no la’o hamutuk no votus ba partidu KHUNTO sei aumenta diak liu tan iha futuru maibé importante mak servisu makaas.
“Ha’u fiar katak ho kapasidade ne’ebé mak ita bó’ot sira iha, mai ita hamutuk vota ba KHUNTO, ita sei bele aumenta diak liu tan no ita bo’ot sira nia prezensa, ha’u fiar katak sei bele halo diak liu tan votus partidu KHUNTO sei bele aumenta no fo Vitória ba 2028.”
Konsilleiru Maximu Partidu KHUNTO, José dos Santos “Naimori Bucar” haktuir, esperansa primeiru mak atu ema hotu servisu hamutuk no kontribui ba estadu ida atu ne’e estadu tenke iha sentidu atu bele proteje povu no hadia povu nia nia moris.
“Ita nia esperansa primeiru mak atu ita hotu-hotu nia servisu hamutuk no ita hotu kontribui ba estadu ida atu nune’e estadu ida ne’e tenke iha sentidu estadu atu bele proteje ita nia povu liuhusi politika ida tanba polítika mak sai hafanu politika na’in sira atu bele haree povu sira, se ita la inklui iha politika mak ukun na’in sira matan dukur no sira la hatene saida mak sira atu halo ba povu.”
Naimori hatete, karik povu fo fiar ba partidu KHUNTO fila ba kaer ukun, sei tau prioridade liu ba Dezevolvimentu ne’ebé mak povu hakarak no sei realiza subsidiu $ 200,00, no uma naroman ba povu atu promove nafatin kultura ka lisan Timor nian KHUNTO mos sei fo subsididu ba lia na’in sira ne‘ebé mak hein Uma lisan iha territoriu Timor-Leste.
Entretatu iha atividade reajustamentu no tomada posse ne’ebé mak hala’o iha postu administrativu Matebian Munispiu Baucau, hetan partisipasaun maximu husi estrutura nasional, munisipiu no postu, atividade ne’e hetan seguransa maximu husi PNTL to’o remata.
Jornalista : Nandes