Loluwari Média (Díli) – Produtu sira ne’ebé grupu soru tais produz iha Rejiaun Administrativu Espesiál Oe-cusse Ambeno (RAEOA) laiha iha merkadu.
Xefe Grupo Moris Foun, Marta Lafu hatete, produtu ne’ebé Grupu moris foun faan iha merkadu la folin tanba menus komprador.
“Ami Soru tais ba Tais mane, Tais feto, Selenda no ami mós homan luhu, pasta, Ai-funan, kakehe hodi fa’an iha merkadu Nunben no Tono iha Oé-Cusse laran deit.” Dehan Xefe Grupo Moris Foun, Marta Lafu ba Jornalista Media Tour iha Palaban Pante Makasar RAEOA, kuarta (24/09).
Nia esplika, bainhira sira Soru Tais no homan hodi faan iha RAEOA laran de’it tanba laiha apoiu husi Prezidente Autoridade RAEOA.
“Ami dala ruma la hetan rendimentu di’ak, tanba ami ba fa’an tais sira ne’e iha merkadu Nunben no Tono de’it maibé la folin tanba PAM RAEOA la apoiu ami atu ba faan iha Dili no ba munisípiu seluk bainhira ami faan iha Oé-Cusse de’it rendimentu ladiak” dehan nia.
Nia informa, Tais Feto pakote ida $50, Tais Mane $80 salenda ida $15 hodi bele sustenta ba nesesidade uma laran inklui selu oan sira nia eskola.
“Ami sente la sufisiente ba ami nia nesésidade,dezafiu mak fatin tanba fatin laiha mai ami atu ami utiliza hodi faan ami nia tais no homan sira ne’e” dehan nia.
Tanba ne’e husu ba governu liliu PAM RAEOA atu apoiu no hari’i fatin própriu ba grupu sira ne’e hodi hala’o atividade ho di’ak.
Grupu Moris Foun homan uza Ekipamentus mak hanesan Tali tahan no Akadiru tahan hodi homan Lafatik, Bote, Pasta, kakehe, Aifunan.
Grupu ne’e hari’i iha 2006 iha membru na’in 17 Kompostu husi 4 no Feto 13 ne’ebé durante sira suru tais no homan hamutuk produtu sira ne’e.
Hatan ba kestaun ne’e,Prezidente Autoridade Munisípiu Rejiaun Administrativa Espesial Oé-Cusse Ambeno (RAEOA), Regio Da Cruz salu promete sei ajuda harí mahon ba grupo soru tais no Homana.
“ita tenke haree buat ne’e obrigasaun atu fó mahon ba grupo soru tais no Homana atu sira bele utiliza hodi fan sira nia produto”dehan nia.
Oé-Cusse mós iha sentru Formasaun atu bele fasilita komunidade sira atu iha mós Audivisual atu fasilita ba komunidade hotu-hotu tanba iha RAEOA susar ba Lingua sira seluk.
“Ita sei haruka komunidade soru tais no Homan tuir Formasaun sai hanesan inspirasaun ba komunidade sira seluk katakami bele tansa imi labele no komunidade soru tais sei ba aprende mos iha munisípiu sira seluk.”
PAM RAEOA nia alvu ba komunidade Suru tais no homan mak prontu ajuda sira atu komunidade bele soru tais ne’e sai monitoriza no movimentu emprendedorismu ba RAEOA iha futuru.
Jornalista : Chay Risky