Loluwari Média (Díli) – Prezidente Repúblika (PR) José Ramos-Horta, loke atividade Dili Internasionál Marathon nu’udar Solidaridade Páz Direitus Humanus ba povu Palestina maibé bandu Sidadaun sira atu dada Bandeira.
Adjunta Xefe Casa Sivil Prezidensia Repúblika, Henriqueta Maria da Silva, hatete, Dili Internasionál Marathon sei laiha autorizasaun ba sidadaun sira atu dada bandeira Palestina.
“Ohin ita anunsia ba públiku Dili Internasionál Marathon ho nia tema Fo Solidaridade páz Direitus Humanos ba povu Palestina maibé seidauk Autoriza komunidade sira atu dada Bandeira Palestina iha Dili Internasionál Marathon ida nee.” Dehan Adjunta Xefe Casa Sivil, Henriqueta Maria da Silva, nia konferensia iha Palásiu Prezidensiál Bairo-Pite Díli, kuarta (08/10).
Nia esplika, Komisaun seidauk iha desizaun atu Autoriza Povu lori Bandeira Palestina hodi fo Solidaridade liu-husi Dili Internasionál Marathon.
Eventu Dili Internasionál Marathon ne’e atu fó Solidaridade humana ba Palestina, Unidade no paz iha mundu iha regiaun no mós iha rai laran tanba TL la apoiu pozitivu pozisaun politika ida.
Tu’ir nia Ate agora komisaun seidauk iha Autorizasaun atu utiliza Atributu Palestina no mós Bandeira Palestina nian tanba komisaun depende ba orientasaun.
“Tanba ne’e bainhira ema ruma lori Bandeira Palestina PNTL sei atua bazeia Orientasaun,se laiha orientasaun PNTL la Autoriza tanba komisaun sei iha faze diskusaun ba Asuntu ida ne’e”dehan nia.
Prezidente Autoridade Munisípiu Dili (PAM), Francisco Dos Santos hatete,Solidaridade humana ne’e laos apoiu Politika maibé Solidaridade humana ba maluk sira ne’ebé terus iha Palestina.
“Ita nia Solidaridade ba povu Palestina ne’ebé terus laos ita nia Solidaridade ba Nasaun Palestina tanba ne’e Dili Internasionál Marathon ne’e ita fo ita nia Solidaridade ba povu Palestina.”dehan nia.
Reprezentante Komandu Munisípiu Dili (KMD), Superintendente Asistente Domingos Gomes husu ba sidadaun sira hotu atu kolabora ho Autoridade PNTL ne’ebé sei fo seguransa iha Dili Internasionál Marathon ne’ebé sei realiza iha loron 11 sábadu semana ne’e.
“Realidade ne’ebé akontese bainhira manifestante (EUTL) sira utiliza Bandeira Palestina hodi halo Komvoi tanba ne’e mak Dili Internasionál Marathon nia tópiku atu fó Solidaridade ba Palestina maibe laos atu hasai Bandeira Palestina”dehan nia.
PNTL husu ba komunidade hotu-hotu atu kolabora ho seguransa hodi prevene tanba PNTL la Autoriza Sidadaun sira lori Bandeira Palestina hodi partisipa Eventu Dili Internasionál Marathon.
Jornalista : Chay Risky