Loluwari Média (Díli) – Deskonfia Operadór Telekomunikasaun Telemor ho Telekomcel Fasilita SimCard ba Ema Estranjeiru Utiliza hodi halo Atividade Jogu Online ne’ebé governu bandu ona.
Diretór Servisu Investigasaun Kriminál (DSIK), Superintendente Polísia João Belo dos Reis hatete,PNTL Sei Bolu Operadór Telemor no Telekomsel ne’ebé Deskonfia Fasilita SimCard kuantidade barak ba Jogu Online Iha Timor-Leste.
“Relasiona ho operasaun horikalan loron Kinta 09 fulan Outubru tinan 2025, komesa horseik ami hetan informasaun husi ita nia komunidade sira katak, depois ami anunsiu governu nian katak jogu online hotu-hotu bandu mais iha fatin balun sei loke nafatin iha Zita Plaza no mos Kolmera nian.” Dehan Diretór Servisu Investigasaun Kriminál (DSIK), Superintendente Polísia João Belo dos Reis, ba jornalista sira liu husi konferensia imprensa iha Kuartel Jeral, Caikoli, Sexta (10/10).
Bainhira PNTL simu informasaun husi komunidade sira ekipa lansa kedas operasaun iha oras 23:00 deteta dunik Jogu Online ne’ebé la’o hela iha fatin rua hanesan Zita Plaza no Colmera.
Husi operasaun ne’e Polísia detein nain ba autor Jogu online hamutuk nain 10 husi sidadaun Estranjeiru Sineza no mós Indonesia balun ne’ebé halo hela prosesu identifikasaun.
“Evidensia sira ne’ebé ita rekolla husi jogu ne’ebé mak sira la’o dadauk mak parte Zita Plaza nian telefone Readmi, Xiomi hamutuk 68, tablet 1, laptop 5, simkard telemor 521, Telkomsel 375, no Parte Kolmera lantai II laptop 2, telefone 34, parte Klmera lantai I sei iha prosesu kontajem inklui pasaporte 4 tuir loloos 10 maibé 6 ohin lokraik mak foin rekolla.”dehan nia.
Nia informa, SimCard husi operador rua Telemor no Telkomsel kuaje kaixa boot ida resin ne’ebé sei iha prosesu kontajem hela.
“Tanba saida mak produs SimCard barak hanesan ne’e mós ami sei bolu hotu operador Telemor no Telekomsel. Identifikasaun sei la’o tanba saida mak kompañia ida bele hetan SimCard to’o dos ida resin.”dehan nia.
PNTL registu ona kontaktu ho prokurador kontinua ohin lokraik loron Sexta 10 fulan Outubru tinan 2025, registu ona Numeru Uniku Krimi (NUK) 0323/2025.
PNSIK konsidera Jogu online ne’e uja telefone Call Centre ka penipuan online nian ne’ebé prosesu identifikasaun sei aprezenta hotu ba Tribunál.
Alende ne’e Prosesu Investigasaun ba traballador Timor oan feto no mane husi fatin rua kuaze 60 resin sira ne’e la’ós autor, maibé sira ne’e hanesan vítima ne’ebé hetan kontratu husi kompañia atu servisu iha ne’ebá maibé sira fila hotu ona.
“Ami husu kooperasaun husi ema hotu-hotu, komunidade iha fatin ne’ebé de’it karik hetan informasaun Jogu online ho tipu hanesan ne’e bele kontaktu ami, Jogu online ida agora ne’e liu husi telemovel la uja komputador, sira uja telefone kontaktu ba nasaun seluk ne’ebé mak joga sira kontaktu malu.”deha nia.
Jornalista : Chay Risky