Loluwari Media (Dili) – Era Dijitalizasaun ne’ebé oras ne’e Timoroan sira utiliza hela iha plataforma dijitál maioria seidauk iha koñesimentu didi’ak kona-ba oinsa atu guarda dadus iha média sosiál.
Formadora Dalia dos Reis hatete,Timoroan barak mak seidauk Komprende no seidauk hatene proteje sira nia dadus iha media sosiál.
“Ita hotu hatene katak agora tempu era dijitalizasaun entaun ema hotu-hotu tenke aprende kona-ba oinsa mak ita tenke proteje ita nia dadus sira liu husi dijital nian hanesan liu-liu iha media sosiál”Dehan nia ba loluwari.tl iha Salaun Sentru Rekursu Feto, Fundasaun Alola Taibesi, foin lalais
Tanba maioria TL ema uza de’it media sosiál, sira lahatene katak ida ne’e asegura dunik sira nia dadus ka lae? no maioria sira uza hanesan sira ne’ebé mak iha personál branding.
Tanba dala barak dadus liu husi link ne’ebé la klaru hodi bosok atu tama ba ema nia facebook no email sira hodi hatene ema nia dadus privadu sira.
“Ita tenke buka hatene uluk nia dadus ne’e di’ak ka lae see bainhira ita kliik link sira ne’ebé mak hanesan ladun di’ak entaun ida ne’e bele foti ita nia dadus no ida ne’e sei hamosu problema mai ita tanba dala-ruma dijitál mós sai problema pesoál ba ema ida-idak nian”dehan nia.
Nia hatutan, iha era dijital ne’e mós problema laos mosu ho fizikamente de’it maibé problema ne’ebé mak dala-ruma mosu iha era agora ne’e mak psikolojikamente iha era dijitál ne’e rasik.
“Liu-liu ita nia psikolojikamente tanba dala-ruma ne’e ita hanoin katak problema ne’e mai husi fizikamente maibé problema ne’ebé mak mosu iha era agora ne’e mak psikolojikamente akontese husi dijitalizasaun ne’e rasik”dehan nia.
Iha fatin hanesan,koordenadora Sentru Rekursu Feto Apolonia Maria da Costa,Fundasaun Alola konvida estudante no joven sira atu hasae sira nia koñesimentu ba iha plataforma online tanba balun uza media sosiál la seguru.
“Fundasaun Alola fornese liu-liu kona-ba literasia dijitalizasaun ho personál branding liga ho literasia dijitalizasaun ne’ebé mak agora dadauk ema barak uza media sosial la seguru”dehan nia.
Entaun oportunidade ida ne’e konvida jovens sira atu mai hasae sira nia koñesimentu oinsa asesu utiliza telemovel ba asesu ba media online sira ne’ebe mak dala barak ema uza la tuir ninia plataforma ne’ebe mak iha.
Tuir Nia, Fundasaun Alola iha Programa 4 mak hanesan; programa saúde inan-oan, programa hakbiitk ekonomia feto, programa advokasia, programa edukasaun no literasia.
Estudante Eskola Sekundaria Amigos Jesus Fevia Jezuinho Rodriges hato’o agradese ba Fundasaun Alola tanba fó oportunidade ba estudante sira hodi tuir formasaun atu hatene klean liu kona-ba uza media sosial iha era dijitalizasaun.
“Ha’u agradese ba Alola Fundation tanba konvida ona husi Amigo de Jesus tanba ha’u mós bele hola parte iha formasaun ne’e bele aumenta tan hau nia koñesimentu kona-ba dijitál”dehan nia.
No bele hatene oinsa mak bele tau seguransa ba an rasik liu husi dijitál ne’e rasik tanba bainhira kuandu uza ho di’ak mak sei fó impaktu ne’ebé mak pozitivu.
Jornalista : Alberto Pires
Editor : Herminio Cardoso