Loluwari Média (Díli) – Konsellu Imprensa (KI) ensera ona formasaun Investigativu ba jornalista hamutuk na’in 20 ne’ebé hala’o iha Munisípiu Ainaru postu Administrativu Maubise.
Konseleiru KI Joaquim de Fatima Coutinho, Lori Konsellu Imprensa nia naran hato’o obrigadu wain ba Jornalista sira hotu ne’ebé durante semana ida tuir formasaun Investigativu iha Maubisse.
“Ami agradese ba Formadór Baskoro husi MediaTempo nian ne’ebé mai fahe nia esperiénsia kona-ba servisu jornalista Investigativu” dehan nia iha Hotel Sara Maubesi Vila, Sesta (24/04).
Nia haktuir, KI hanesan Monitorizasaun ba Média iha TL sempre nafatin kapasita Jornalista sira oinsa atu haklean jornalista sira nia koñesimentu liu-liu iha área Investigativu nian.
“Ha’u husu ba imi hotu-hotu formasaun Investigativu ne’ebé imi aprende hamutuk ho jornalista antigo ne’e sai hanesan bukae ida ba imi hotu oinsa imi fila-fali ba ida-idak nia instituisaun bele utiliza maneira oinsa bele halo kobertura investigativu kazu barak iha Timor-Leste”dehan nia.
Tanba Jornalista dala-barak hetan krítiku husi Xefe Governu tanba ne’e mak governu preve osan ba KI hodi halo Formasaun Investigativu ba jornalista sira atu bele kobertura ba investigativu iha Timor-Leste.
“Ita hetan formasaun Investigativu durante sema ida iha Maubisse no sei kontinua ba iha Díli atu haklean liu-tan imi nia koñesimentu oinsa atu halo kobertura ba investigativu labele akompaña Media Sosiál hodi halo kobertura ne’e fo impaktu ba Média iha TL”dehan nia.
Representa Jornalista Manuel Sarmento, lori Jornalista na’in 20 agradese ba Konsellu Imprensa tanba bele fasilita ona Formasaun Investigativu durante semana ida nia laran sai hanesan bukae ba jornalista sira atu halo kobertura ba investigativu iha ida-idak nia Média.
“Ha’u sente previlejiu ida ba ami Tanba KI bele fasilita formasaun Investigativu mai ami Jornalista na’in 20 ne’ebé mai husi instituisaun Média 20″dehan nia.
Reprezenta Radio Komunidade, Imaculada Mendonça Espiritu Santo, Sente kontente ho formasaun Investigativu ida ne’e importante no interesante tebes ba jornalista sira liu-liu ba Radio Komunidade sira iha Munisípiu.
“Tanba ami halo kobertura de’it maibé ami seidauk hatene saida mak Reportajen Investigativu, ho formasaun ida ne’e hanesan oportunidade osan mean ida mai ami liu-liu ami Radio Komunidade sira aumenta ami nian kapasidade oinsa ami bele halo kobertura investigativu”dehan nia.
Jornalista : Cesar Pires
Editór : Herminio Cardoso