Loluwari Média (Díli)– Ministériu Edukasaun (ME) hamutuk ho Ministériu Transporte Komunikasaun husi nasaun Kamboja halo kooperasaun servisu hodi implementa plataforma dijitál kona-ba verifikasaun dokumentu liu-liu legaliza diploma.
Ministru Komunikasaun Transporte Camboza Chea Vandeth hatete,programa ne’e lansa ona hamutuk ho Ministériu Transporte no Komunikasaun Timor-Leste no iha vizita ba ME ne’e mós ho objetivu atu esplora posibilidade uza plataforma refere iha área edukasaun.
“Ohin ami mai vizita Ministériu Edukasaun atu diskute posibilidade rezidente plataforma refere iha Timor-Leste, liu-liu iha área edukasaun” dehan nia ba jornalista sira iha Ministeriu edukasaun (ME) rua vila verde Dili Tersa (2/06)
Nia dehan, plataforma “Verify” bele fasilita proteje dokumentu edukasaun sira hanesan sertifikadu estudante nian. Benefísiu boot liu mak estudante Timor-Leste.
Ne’ebé estudu ka buka servisu iha nasaun seluk labele presiza mai legaliza fízikamente sira-nia sertifikadu iha Ministériu Edukasaun hanesan pratika durante ne’e.
“Di’ak ida plataforma ne’e fó posibilidade katak kuandu uza atu asesu ba edukasaun iha nasaun seluk, la presiza mai legaliza sira-nia sertifikadu iha Ministériu Edukasaun. Maibé bele uza de’it plataforma ida ne’e tanba dokumentu iha ne’eba salva ona”dehan nia.
Tanba nasaun sira ne’ebé uza sistema “Verify” mós bele direta asesu no fó rekoñesimentu ba dokumentu ne’e. Se nasaun seluk seidauk uza, Ministériu liuhosi embaixada Timor-Leste nian.
Atu bele informa ba nasaun refere atu estudante nia dokumentu ne’ebé imprime husi plataforma bele hetan rekoñesimentu, la presiza halo legalizasaun fízika hanesan pratika durante ne’e.
Iha fatin hanesan, Ministra Edukasaun (ME), Dulce de Jesus Soares, konsidera inisiativa ne’e nu’udar avansu boot ida ba servisu Ministériu Edukasaun iha TL nian.
“Ha’u hanoin katak ne’e kuandu Ministériu Edukasaun aplika ida ne’e tebes duni liu-husi halo kooperasaun hamutuk ho Ministériu Transporte Komunikasaun Timor-Leste tanba sira uza ona. Hau hanoin ida ne’e sei sai avansu boot ida iha servisu Ministériu Edukasaun.”
Nia reforsa katak plataforma ne’e mós fasilita tebes nesesidade estudante sira nian tanba daudaun ne’e estudante Timor-Leste barak estuda iha nasaun barak.
“Ami lakoi prejudika sira,maibé hakarak fasilita atu nune’e joven sira bele kontinua sira-nia estudu ka buka servisu ruma iha nasaun seluk fasil liu ba sira”dehan nia.
Jornalista Estajiária : Ivónia dos santos /Graciela Rei-Leve da Silva
Editór : Herminio Cardoso