Loluwari Média (Díli) – Estadu Timor-Leste simu novidade tristeza boot tanba lakon saudozu Francisco Guterres “Lu-Olo” nu’udar eis Prezidente Asembleia konstituiente Parlamentu Nasionál, Eis Prezidente Repúblika no atuál Prezidente Partidu FRETILIN ne’ebé hakotu nia peregrinasaun moris iha mundu.
Tanba ne’e Nonu governu liu-husi Konsellu Ministru extra-ordináriu sei dekreta lutu semana ida ba falesimentu Saudozu Francisco Guterres “Lu-Olo” ne’ebé oras ne’e nia isin mate sei iha Malaysia hodi lori mai TL.
Nune’e, Primeiru Ministru Interinu Vise-Primeiru Ministru Koordenadór Asuntu Sosias no Ministru Dezenvolvimentu Rurál habitasaun Komunitáriu, Mariano Assanami Sabino hatete, povu Timor-Leste tomak tristeza tanba lakon lider Importante ida ne’ebé TL sei lutu metan ba loron 7.
“Horikalan ita rona novidades tristeza ne’ebé ita lakon ita nia aman luta na’in ida ne’ebé hakotu iis iha Malaysia, nu’udar Primeiru Ministru Interiñu hamutuk ho Ministru sira sei halo lutu Nasionál ba loron hitu” Dehan Primeiru Ministru Interinu Vise-Primeiru Ministru Coordenador Asuntu Sosias no Ministru Dezenvolvimentu Rural habitasaun Komunitáriu, Mariano Assanami Sabino ba jornalista sira iha Palacio Governo Timor-Leste, Segunda (22/06).
Assanami hatete, povu TL triste tanba lakon lider Rejistensia, lakon kompatriota, kamarada di’ak ida ne’ebé uluk dedika nia aan tomak ba Rai doben Timor-Leste ida ne’e.
Nune’e, Governu sei organiza membru governu no povu Timor-Leste hein Maktoban nia mate isin iha Aeroportu Internasionál Nicolao Lobato Díli iha loron aban ho Aviaun Aero-Díli.
“Ita sei aluga Aviaun Aero-Díli tanba Aviaun Aero-Díli uza mós bandeira Nasionál sai espesiál ba Maktoban ho nia família de’it mak sae, ha’u reprezenta Nonu governu Konstitusionál fó sentidu kondolensia klean ba família bo’ot Partidu FRETILIN no ba povu Timor-Leste.”dehan nia.
Iha fatin hanesan, Ministru Asuntu Combatentes Libertasaun Nasional (MACLAN), Gil da Costa Monteiro “Oan Soru” Afirma, hanesan Veteranu sente lakon lideransa ida ne’ebé durante luta 24 anos hamutuk ho nia povu nunka hakruk ba politika Invazór sira nian to’o TL hetan nia independensia.
“Ita haree ba restauransaun independénsia tinan 24 nia husik ona ita, ita sei trata nia hanesan Timoroan espesialmente hanesan Veteranu ha’u hanesan Ministru ne’ebé tutela ba Kombatentes Libertasaun Nasionál estadu iha dever no morál atu responsabilidade no akompaña ba Saudozu nia mate isin husi Aeroportu to’o mai nia rejista.”
Maktoban sofre moras ba halo tratamentu saúde iha Kuala Lumpur Malaysia iha dia 23 fulan Maio aban kompleta fulan ida maibé hori kalan novidade triste tanba la konsege salva nia vida.
Jornalista : Cesar Pires
Editór : Herminio Cardoso