Loluwari Média (Díli) – Estudante sira husi Fundasaun Kristál sente triste tanba lakon lider ida ne’ebé ho simples hanesan saudozu Francisco Guterres Lú-Olo ne’ebé durante ne’e sakrifika an ba rai Timor-Leste to’o hakotu nia viazen moris iha mundu.
Reprezentante Estudante Fundasaun Kristal Cedelicio Ximenes hatete, Povu lakon aman Francisco Guterres Lú-Olo lakon duni saida mak nia promete ba povu seidauk realiza hotu maibé Maromak bolu ona nia.
“Ami Sente triste tebes, ami lori Universidade Cristal fó sentidu kondolensia profunda ba saudozu Francisco Guterres Lú-Olo no fó koragen ba Espoza nu’udar Estudante Cristal tanba ita hotu-hotu la espera ita lakon ita nia Aman di’ak ida.” Dehan Reprezentante Estudante Fundasaun Kristal Mane, Cedelicio Ximenes ba jornalista Sira iha Rejidensia Maktoban Farol Díli, kuarta (24/06).
Jerasaun foun, Nia dehan, presiza tebes saudozu Francisco Guterres Lú-Olo nia apoiu morál ba jerasaun foun sira maibé distinu mak nune’e ona tanba saudozu nia Kontribuisaun ba rai no povu ida ne’e boot no aas tebes.
“Maktoban lidera konstitusionál no fó korajen katak unidade nasionál ne’e husi ita nia fuan ho nia mensajen ida ne’e mak halo ami jerasaun foun sente triste no fuan kanek tanba ita lakon duni ona ita nia lider di’ak aman di’ak ida hanesan Doutor Francisco Guterres Lú-Olo.”
Nia haktuir,Ko’alia kona-ba lider Antigos sira,saudozu Lú-Olo, lider ida ne’ebé fuan boot no nunka hasoru nia lider sira seluk tantu lider politika sira seluk maske ema kritika tarata nia maibé lider ida ne’ebé fuan osan mean hodi hamnasa hasoru de’it.
Estudante Cristal Odelia Soares reforsa,hanesan Estudante no jerasaun foun sente triste tanba lakon Aman no lider di’ak ida.
“Ohin ami Estudante Fundasaun Kristál mai iha ne’e atu fó presta homenajen ba ita nia Maktoban no fó koragen ba Feto faluk no Oan Ki’ak tanba aman ida ne’ebé lakon hanesan Ai-Mahon ida monu lakon sanak atu fó mahon ba nia Oan sira.”dehan nia.
Reprezentante Estudante Fundasaun Kristál sira ne’e husu atu estadu TL presiza tenke tau matan nafatin ba saudozu nia esposa ho nia oan ki’ak na’in haat feto ida Mane na’in tolu.
Jornalista : Cesar Pires
Editór : Herminio Cardoso