Loluwari Média (Indonézia) – Sorumutu Bilateral entre Xefe Estadu rai rua Prezidente Repúblika (PR), José Ramos-Horta no Prezidente Prabowo Subianto horseik Sexta feira iha Palásiu Prezidensiál, Jakarta, 28 Agostu 2026.
Enkontru refere la’o ho susesu, hafoin agenda ba enkontru antes ne’e adia dala barak.PR José Ramos Horta lori laureadu Nobel sira kuaze na’in 20, hafoin enkontru no seminar kona-ba siénsia ne’ebé realiza foin lalais iha Dili. Ne’ebé hala’o durante loron tolu husi 24-26 Agostu. Vizita ne’e tama mos iha delegasaun ho Prezidente Ramos-Horta nian hodi akompaña banhira hala’o vizita kortezia iha Indonézia. Lauredu Nobel hirak ne’e mai husi figura importante sira iha área páz, sientista sira, kimiku sira no mos expertu iha área espesializasaun oioin.
Prezenja hosi figura importante sira ne’e, inklui Premiadu Nobel ba páz sira, ne’ebé akompaña Prezidente José Ramos-Horta, durante Vizita Estadu ba Indonézia, bele konsidera nu’udar pasu diplomátiku importante ida, la’ós de’it mai ita Timor-Leste, maibé mós ba Indonézia no esforsu ne’e atu hametin relasaun no kooperasaun di’ak entre rai rua.
Jestu diplomátiku PR Ramos-Horta hanesan mos Lauredu nobel ba Páz, ne’ebé konvida direita figura importante sira ne’e hodi akompaña nia durante Vizita Estadu ba Indonézia no Vizita kortezia ida ho Prezidente Prabowo Subianto, bele haree hanesan parte hosi esforsu ida atu promove diálogu, dame no kompriensaun mútua entre povu no rai rua.
Iha enkontru ne’e Prezidente Ramos-Horta mos konvida direita Prezidente Prabowo atu nia bele vizita Timor-Leste no Prezidente Prabowo Subianto simu ona konvite ne’e hodi realiza vizita ne’e iha tempu badak.
Relasaun bilateral ne’ebé forte no bazeia ba konfiansa bele sai dalan importante atu kontinua avansa negosiasaun kona-ba asuntu estratéjiku, inklui delimitasaun no rezolusaun fronteira marítima entre Timor-Leste no Indonézia.
Ba ita Timor-Leste, diplomásia ida ne’ebé konstrutiva, independente no bazeia ba respeitu mútua la’ós de’it hatudu ita nia integridade iha arena internasionál, maibé mós ne’e bele hafasil buka solusaun ba asuntu sira ne’ebé seidauk rezolve entre país rua. Hametin relasaun di’ak ho Indonézia, ho baze iha konfiansa, kooperasaun no diálogu, sei sai elementu importante ida ba estabilidade no prosperidade komún iha futuru.
Jornalista : Cesar Pires
Editór : Herminio Cardoso