Loluwari Média (Díli) – Sekretariu Jeral Partido Demokratiku (PD), António da Conseição “Kalohan”, hatete, sei kontinua servisu ne’ebé Embaixadór Suiça uluk ne’ebé sei halo kooperasaun Bilaterál diak entre nasaun sira seluk.
“Ha’u nia prioridade mak tenke kontinuidade ba diplomásia ne’ebé mak Embaixadór sira uluk ezerse ona iha zenebra ne’ebé ligadu ba Nasoes Unidas (NU) ninia organizasaun ne’ebé agora daudaun iha ne’eba inklui mos organizasaun internasional seluk ne’ebé mak iha.” Dehan Sekretariu Jeral PD, António da Conçeição “Kalohan” ba jornalista sira iha Palasiu Prezidensial Nicolau Lobato, Bairro-Pité, Dili hafoin simu pose husi Prezidente Repúblika, kuarta (12/02).
Nia subliña ezerse atu nafatin relasaun Bilateral ho Suiça maske rai ne’e dok husi Timor-Leste.
“Seidauk iha historia bo’ot ba ita Timor-Leste entermus kooperasaun maibé ita tenke buka no promove interese ne’ebé mak presiza atu dezenvolve ho governu ba Suiça ne’e rasik.”
Suiça iha mos apoiu ba sosiedade Sivil iha Timor-Leste ba atividade pequena klasse iha Timor tanba ne’e mak sira labele ezerse bilaterálmente ho governu maibé sira mos bele halo atividade direitamente ho sosiedade Sivil ne’e entermus ba kooperasaun bilaterál.
“Atu kontinua servisu sira ne’e ita atu promove kontestu Timor-Leste nian bainhira ita hakarak atu halo dezenvolvimentu ita buka halo parseria ho governu Suiça, no ha’u sei kontinua servisu ne’ebé uluk Embaixadór sesante halo tiha ona ligadu ba Direitus Humanus ligadu mos ba ita nia adezaun ba Organizasaun Mundial Komersiu (OMK).”
“Timor-Leste sai ona membru Nasoes Unidas tanba ne’e Timor-Leste tenke partisipa iha asesoen no debate hotu-hotu iha Nasoes Unidas nian hanesan membru, Timor-Leste mos iha responsabilidade ativu iha membru nian tanba Sua Exelénsia Prezidente Repúblika (PR) José Ramos-Horta, fo prioridade ne’ebé mak atu halo.
“Prezidente Repúblika rekomenda atu tetu didi’ak molok foti desizaun ne’ebé mak reprezenta Estadu Timor-Leste nian.
Jornalista : Chay Risky