Loluwari Média (Díli) – Komandante Operasaun Munisípiu Dili, Superintendente Asistente Polísia, Luís Amaral, hatete, daudaun ne’e Polísia Nasionál Timor-Leste (PNTL) Komandu Munisípiu Dili halo identifikasaun ba Suspeitu ne’ebé halo agresaun fízika hasoru Vítima tanba diskunfia selingkuh ho nia kaben. KMD investiga suspeitu sira ne’ebé baku vítima no halo video viral iha media sosiál.
“Suspeitu na’in-haat mak ita foti, ita halo identifikasaun de’it depois ita sei halo prosesu tu’ir dalan legal, tanba atuasaun ne’e bazeia ba keixa husi vítima nia família.” Dehan Komandante Operasaun Munisípiu Dili, Superintendente asistente polísia, Luís Amaral, ba jornalista sira, iha KMD, Kaikoli, Tersa (08/04).
Amaral dehan, oras ne’e prosesu investigasaun la’o hela, no tu’ir informasaun ne’ebé viral iha media sosiál liliu Facebook hatudu katak suspeitu nia kaben selingkuh ho feto seluk.
“Ita seidauk hatene tanba sei iha investigasaun, maibé tu’ir facebook fó sai katak sira deskontente ho labarik mane oan ne’ebé mak iha relasaun ho feto oan ne’e, depois mak sira ba halo agresaun fízika ba alin feto ne’e.”
Kronolojia kaju ne’e akontese iha Segunda (07/04) iha Kapitál Dili.
“Akontesimentu ne’e maiz ou menus lokraik, no ita hetan keixa direta husi parte vítima no eskuadra Dom Aleixo halo atuasaun kedas hodi foti suspeitu sira ne’ebé mak viral iha Media sosiál.”
Iha kazu suspeitu feto ne’e ho naran inisiál JMB ne’ebé komete krime ofensa integridade Fízika simples no suspeitu halo video viral iha Facebook ne’e ho naran insiál VJL. No suspeitu feto rua seluk ho inisiál ELP no MdS ne’ebé polísia halo identifikasaun ba sira hodi hein prosesu investigasaun.
Jornalista : Chay Risky