Loluwari Média (Díli) – Komandante Munisípiu Dili (KMD), Superintendente Xefe Polisia, Orlando Gomes, hatete, komandu jeral Polísial Nasionál Timor-Leste (PNTL) orienta membru Polísia Tránzitu hotu iha komandu Dili tenke servisu ho profisionál.
“Ohin Komandu Munisípiu Díli hala’o enkontru ho ita nia membru Polísia Tránzitu Seguransa Rodaviariu Munisípiu Díli, sira kuaze ualu nulu resin, objetivu enkontru ne’e atu orienta sira atu servisu bazeia ba orientasaun Komandante Jerál hato’o mai ita nia membru Tránzitu sira atu nune’e sira servisu ho profisionál.” Dehan Komandante Munisípiu Díli (KMD), Superintendente Xefe Polísia, Orlando Gomes, ba jornalista sira, hafoin reuniaun ho membru polísia Tránzitu sira iha Komandu Dili Kaikoli, Tersa (09/04).
Gomes enkoraja, membru sira atu servisu tu’ir regra hodi bele orienta Transporte Públiku no privadu la’o tu’ir nia dalan, nune’e labele hamosu engarrafamentu iha dalan publiku iha kapitál Dili.
“Oinsá mak sira bele halo servisu di’ak, halo kontaktu ne’ebé mak di’ak iha terenu atu nune’e bele asegura movimentu estrada sira, ho kontrola transporte sira ne’ebé para iha estrada la tu’ir regra, haree ba movimentu no engarrafamentu sira iha Dili laran.”
Nia husu membru sira atu halo atendimentu ba asidente trafegu sira tenke ho responsabilidade perante iha lei no orden, liliu atendimentu ba povu ho dignu atu nune’e ba oin povu nafatin tau konfiansa ba instituisaun PNTL. Tanba agora daudauk membru tránzitu iha kapitál Dili la sufisiente no ba futuru presiza aumenta nune’e bele koloka membru sira ne’e ba fatin sira ne’ebé mosu engarrafamentu makaas.
“Ha’u hanoin ba futuru ita presiza aumenta tan atu nune’e bele koloka iha postu tránzitu sira ne’ebé mak kolokadu ona iha Dili laran, no mós ita koloka iha fatin sira ne’ebé risku ba engarrafamentu.”
Komandu Dili mós kontinua koloka membru sira hodi akompaña situasaun iha kapitál Dili, liga ho asidente trafegu sira. Iha mós ekipa ida hodi halo patrullamentu ka swiping iha Dili hodi implementa lei kódigu Estrada.
“Daudaun ne’e, iha Postu Sanulu resinhaat mak ita estabelese ona iha kapitál Dili, no kada postu koloka membru na’in rua ka tolu hodi truka malu durante oras servisu.”
Jornalista : Chay Risky