Loluwari Média (Atauro) – Prezidensia Republika liuhusi Diresaun Servisu Sosiedade Sivil no Asuntu Sosial Oferese uma dignu ida ba Tiu Luciano ho Nia Espoza Regina Soares ho oan feto Leliana Perreira iha Suku Makili, aldeia, Maulako, Postu Admistrativu Atauro, munisipiu espesial Atauro.
Tu’ir Assesor Diresaun Servisu Sosial no Assuntu Sosial, Quintiliano Moniz Carvalho hatete, objetivu lansamentu uma ne’e tanba iha momentu balu liu ba observa direita husi Assesor SSAS ho ekipa tun direita hodi survey kondisaun Uma familia Luciano nia kondisaun grave tanba ne’e mak Xefe suku Makili halo proposta, haruka ba Prezidente Republika (PR), José Ramos-Horta, nune’e sua exelensia PR ho laran luak apoiu uma dignu ba familia Luciano ho nia espoza ohin halo lansamentu primeira pedra iha fatin ne’e.
“Ohin halo de’it lansamentu ba primeiru pedra, akompaña ho PAM Atauro no autoridade lokal no familia vulneravel sira nune’e Ita entrega ba Autoridade munisipiu no suku sira atu akompaña prosesu konstrusaun uma ho durasaun fulan tolu bele finaliza ona.” Dehan Assesor Diresaun Servisu Sosial no Assuntu Sosial, Quintiliano Moniz Carvalho, ba jornalista sira iha Atauro, segunda (02/06).
Nia dehan, apoiu hirak ne’e inisiativa Prezidente Republika nian atu fahe domin ba familia difisiente no vulneravel sira ne’ebé mak presiza apoiu.
“Uma ne’ebé ita nia Prezidente Republika hari’i ba familia vulneravel ho medida 8×7, iha haris fatin, dapur no mos kios, durasaun ba kontrusaun uma refere durante fulan tolu termina ona no halo inaugurasaun.”
Xefe Familia vulneravel, Luis Pereira, agradese ba Prezidente Republika, José Ramos-Horta, Tanba PR bele fahe nia domin hodi hari’i uma medida 8×7 ba sira hodi satan anin udan no loron manas.
“Ami laiha tan liafuan seluk atu ko’alia, ami fo de’it obrigadu ba PR ne’ebé bele oferese nia domin mai ami familia simples ida ne’e.”
Prezidenti Autoriade Atauro, Mateus Belo, agradese ba Prezidente Republika tanba oferese ona uma medida 8×7 ba nia povu ne’ebé moris ho vulneravel sira tanba familia ida ne’e merese atu hetan tulun.
“Ami nia agradesimentu klean ba PR ne’ebé sempre apoiu ba povu ne’ebé moris vulneravel presiza duni ema hotu nia apoiu, ajuda ida mai husi orsamentu Prezidensial no mos mai husi Prezidente nia kolegas sira iha Japaun, Korea, Australia no Honkong. No mos apoiu husi Prezidente nia vensimentu fulan-fulan.”
Jornalista : Chay Risky