Loluwari Média (Díli) – Ministru Turizmu no Ambiente, Francisco Kalbuadi Lay, informa, ohin dadersan prezidente republika (PR), Jose Ramos-Horta, konvoka reuniaun ida liuhusi Xefe Kaza Sivil konvida Ministru Turizmu no Ambiente, hamutuk ho Ministru Juventude Desportu Arte no Kultura (MJDAK) ho Prezidente Siklismu no mós Prezidente Federasaun Atletizmu Timor-Leste, hodi diskute kona-ba desportu no festival kulturál sira.
“Ohin ami mai diskute hamutuk iha desizaun balu ne’ebé iha tempu kuartu sei hala’o nafatin liliu, Dili Internasional Marathon nian, ne’e ho tema foun.”
“Ita hotu hatene katak, geo-polítika ne’ebé akontese iha mundu ne’ebé ho títulu mai husi PR, Ha’u hanoin ne’e briliante teb-tebes mak títulu naran halai solidaridade ita nian hanesan mundu tomak fó ba, ida ne’e atividade dahuluk ne’ebé sei halo.” Dehan Ministru Turizmu no Ambiente, Kalbuadi ba jornalista sira hafoin enkontru ho PR Horta iha Palásiu Prezidensiál Bairro-Píte, Tersa (08/07).
Kalbuadi hatete, Ministru Turizmu no Ambiente, no Ministru Juventude Desportu Arte no Kultura ho Prezidensia Repúblika sei realiza tan kompetisaun Dili International Marathon iha Outubru 2025.
Ministru Juventude Desportu Arte no Kultura (MJDAK), Nélio Isaac Sarmento, hatete, iha Outubru ida ne’e, sei realiza kompetisaun Dili Internasional Marathona, ne’ebé ninia merkadu partisipasaun país sira ASEAN, inklui ho internasionál sira ne’ebé hela iha Dili.
“Ita nia atleta nasionál sira, sei partisipa iha Dili Internasional Marathon.”
Nelio argumenta, teknikamente ekipa ne’ebé kompostu husi Palásiu Prezidensiál, Ministru Juventude Arte no Kultura, Federasaun Siklizmu no Atletizmu Timor-Leste, sei elabora kritéria sira hotu, depois sei anunsia ofisiál iha tempu besik.”
Prezidente Atletizmu, Afranio Xavier Amaral, informa, Vise Primeiru Ministru ho Ministru Juventude Arte no Kultura, partilla ona informasaun, no Federasaun Atletizmu iha protidaun atu apoiu iha parte tékniku.
“Ministru Juventude Arte no Kultura mensióna katak Dili Maratona ida ne’e Federasaun Atletizmu sei prepara husi parte tékniku, nune’e eventu ne’e bele la’o ho di’ak, no partisipasaun máximu liliu ASEAN.”
“Atleta ho atleta nasionál sira no sosiedade Timor rasik, tanba Timor-Leste mak sai uma na’in ba realizasaun jogu ida ne’e”.
“Ha’u espera katak apoiu husi Palásiu Prezidensiál, Ministru Juventude Arte no Kultura, no mós Ministru Turizmu no Ambiente, ha’u garantia katak parte tékniku sei la’o susesu ho di’ak.”
Jornalista : Chay Risky