Loluwari Média (Díli) – Komandu Jerál Polísia Nasionál Timor-Leste (PNTL), Komisariu Jerál, Henrique da Costa, husu ba Komandu munisípiu 14 inklui mos Komandante Unidade sira atu hala’o servisu ne’ebé efika no hadia buat ne’ebé falla.
“Objetivu husi avaliasaun servisu ne’e atu hadia buat ne’ebé ita hala’o ona no sei servisu ho profisionál liu tan, ba oin ne’ebé ita sei hasoru dezafiu bo’ot.” Dehan Komandu Jerál, Polísia Nasionál Timor-Leste (PNTL), Komisariu Jerál, Henrique da Costa, ba jornalista sira, iha Centru Formasaun Polísia (CFP) Comoro, Dili, kinta (10/07).
Henrique esplika PNTL halo atendementu ba publiku atu halo prevensaun krime organizadu sira no mos kazu sira ne’e tanba Autoridade Seguransa tenke kumpri nia misaun kualkér tempu.
“Ita hanesan autoridade seguransa atu ita bele servisu ho diak hodi halo atendementu ba publiku ita atu manan publiku nia konfiansa, no ita bele halo mudansa servisu instituisaun PNTL.”
Servisu PNTL dalaruma mos iha nia impaktu negativu no mos iha pozitivu tanba ne’e komandu Jerál husu ba Komandante munisípiu 14 inklui Komandante Unidade sira atu orienta membru sira hala’o nia kna’ar ho profesionál.
“Ha’u husu mos ba komandante Unidade Patrullamentu Fronteira (UPF) atu kontrola ita nia fronteira 4 husi Batugade, Mota Masin, Sakato no Oesilo ne’ebé oras ne’e daudaun ita nia sidadaun sira tama sai hodi ba tu’ir Arte-Marsiais iha nasaun viziñu Indonésia.”
Komandante Jerál husu Komandante munisípiu Bobonaro, Covalima, RAEOA no Ermera, atu koloka nia membru sira ba apoiu UPF atu kontrola fronteira sira ne’ebé mak sidadaun sira tama sai hodi ba tu’ir seremonia Arte-Marsiais nian.
Tanba fulan hirak ne’e ita nia UPF kontinua kaptura sidadaun iha fronteira tanba sira sai dalan illegal ba iha mota sorin hodi tuir seremonia graduasaun Arte-Marsiais ka sa’e sintu.
Tanba ita haree esforsu hirak ne’ebé imi halo iha fronteira maibé sidadaun sira kontinua tama sai. Entaun imi halo kooperasaun ho autoridade seguransa iha nasaun viziñu atu nune’e imi bele servisu hamutuk hodi asegura ita nia fronteira.”
Imi nia servisu kooperasaun ho kolaborasaun atu asegura fronteira, imi tenke fahe informasaun ba komandu munisípiu iha fronteira sira, atu sira bele hatene fatin ne’ebé mak babain illegal sira tama sai.
Jornalista : Chay Risky