Loluwari Media (Dili) – ekipa Selesaun Timor-Leste sei hasoru selesaun Portugál iha eventu jogu Comunidade Paises da Língua Portugueza (CPLP) sei monu iha 17 iha Jullu 2025.
Sekretariu Estadu Arte no Kultura (SEAK), Koordenador Jerál jogu (CPLP), Jorge Soares Cristovão hatete, jogu abertura ba eventu liga Comunidade Países da Língua Portugueza (CPLP) entre selesaun Timor-Leste hasoru Portugál mak sei loke no abertura ba eventu refere.
“Ita hatene katak jogu abertura karik ita bo’ot sira fo sai ona ba públiku Timor maka sei joga hasoru Portugál iha joga abertura ba jogu CPLP ida ne’e”, dehan, Koodenador Jerál jogu CPLP, Jorgé Cristovão, iha salaun MJDAK, sexta (11/07).
Nu’udar Koordenador Jerál jogu CPLP, husu ba komunidade no autoridade lokal xefe suku, xefe aldeia no xefe juventude sira ne’ebé iha Timor-Leste, tomak hodi hatudu paz no estabilidade, nune’e hatudu imajen ne’ebé di’ak iha mundu internasionál.
“Husu ba autoridade sira hotu autoridade lokal sira, husi kedas xefe aldeia, xefe suku, lideransa juventude sira ba inan-aman sira, liliu ba joven sira, atividade ida ne’e atu hatudu imajen diak Timor nian, katak Timor iha paz estabilidade ba ita hotu.
Tanba ne’e mak ita presiza hatudu nafatin iha momentu eventu hanesan hatudu paz estabilidade hakmatek ba akompaña ita nia jogu sira ne’e hotu atu nune’e ema hatene katak Timor la’os estadu frazil ida.
Timor nu’udar nasaun ida ne’ebé mak prontu ona atu hatudu nia komitmentu katak timor mós bele atu organiza eventu internasional. Tantu konferensia internasional tantu atividade desportivu internasionál, timor mós prontu ona atu hatudu ida ne’e” nia haktuir.
Jornalista : Anis