Loluwari Média (Díli) – Prezidente komisaun no suprevizaun fiskalizasaun ba revizaun rekrutamentu Polísia Nasionál Timor-Leste (PNTL), 2025, Paulo Assis Belo, hatete, komisaun revizaun ne’e kompostu husi Jerasaun Patriota, membru Parlamentu Nasionál (PN) na’in rua, ajudante Prezidensia Repúblika, Provedor Direitos Humanos no Justisa (PDHJ), funsaun públika no Guarda Nasionál Repúblikana (GNR) inklui Xefe seguransa Embaixadór Portugál mak sira delega ho tan husi Austrália.
“Durante semana ida ho balu komisaun ba revizaun identifika iha munisípiu hotu-hotu polísia sira ne’e kuaze nia oan iha duni, maibé atu okupa númeru ki’ik 1-10 ne’e lae, balu iha númeru boot no balu iha númeru ki’ik maibé ha’u labele fó uluk lai resposta ida-ne’e loloos. Tanba sei iha identifikasaun nia laran.”Dehan Prezidente komisaun no suprevizaun fiskalizasaun ba revizaun rekrutamentu Polísia Nasionál Timor-Leste (PNTL), 2025, Paulo Assis Belo ba jornalista sira iha Sentru Formasaun Polisia CFP Comoro Díli, Kinta (12/03).
Paulo Esplika, iha rezolusaun ba revizaun ne’e loron 20, nune’e sura husi reuniaun primeiru iha dia 26 fulan Fevereiru tinan 2026 ne’e signifika katak loron 27 mai ne’e komisaun tenke entrega ona relatoriu ba governu.
Durante semana ida ho balu komisaun ba revizaun identifika entre nain 400 ne’ebé kontinua ba teste médiku hodi konkore ba vaga polísia nia oan nain 71, no veteranu nia oan nain 72.
“Ami foin hahú servisu iha dia (26/02/2026), fulan kotuk liu bá ami hala’o ami nia primeiru reuniaun, agora dadauk ne’e komisaun komesa halo revé fali prosesu sira ne’e, revé uluk sira 400 liu ne’e revé uluk iha failansu ga laiha failansu, iha manipulasaun ga lae, ko’alia dehan familiarizmu ga laiha familiarizmu komisaun sei haree ida ne’e.”
Maneira revé ne’e haree notas sira ne’ebé públiku fó sai ne’e, no notas sira orijinál ne’e, provas ne’ebé sira halo ne’e iha akordu duni ga lae ka iha manipulasaun ida ne’e mak Komisaun haree.
“Depois reklamasaun sira ne’ebé tama ladún barak ida ami simu to’o agora ne’e 200 reklamasaun de’it, kuaze reklamasaun sira ne’e porvolta kona-ba familiarismu, nepotismu ne’e mak barak no polísia nia oan. Mais ha’u hakarak hateten ba ita boot sira katak Polísia nia oan ne’ebé ami hetan dadus ne’e entre nain 400 ne’e sira iha nain 71 de’it, sira veteranu nia oan ne’e ami hetan nain 72 jerasaun patriota ne’e de’it.”
“Ita haree lai iregularidade ne’e boot liu ga oinsá ne’e sei haree lai, komisaun ne’e la foti desizaun mais sei halo de’it relatoriu ba governu depois husi Konsellu Ministru (KM) mak foti desizaun kona-ba anula totál ga, anula parsial ga ne’e governu mak halo”, dehan Prezidente komisaun ba revizaun Paulo Assis.
Komisaun so halo tuir de’it mandatu ne’ebé governu fó mai halo revizaun bá prosesu hotu-hotu haree failansu iha ne’ebé haree hafoin relata ba governu foti desizaun.
Maske agora dadus ne’ebé komisaun rekrutamentu fó mai ne’e nain 71 mak polísia nia oan, maibé komisaun revizaun sei halo nafatin investigasaun tebes ga lae nain 71 ne’e de’it no nune’e mós jerasaun patriota nain 72.
“Uluk Governu fó kuota pursentu 20 (20%) ba polísia nia oan no pursentu 20 (20%) ba jerasaun patriota maibé PDHJ foti problema ne’e ba iha Tribunál Rekursu deklara katak ne’e inkonstitusionál ne’ebé Kuota ne’e ami la aplika ona, signifika sira hotu-hotu iha direitu atu bele kandidata an ba polísia.”
Jornalista : Cesar Pires
Editor : Herminio Cardoso