Loluwari Média (Díli) – Sekretáriu Estadu Komunikasaun Sosiál (SEKOMS) asina kontratu tan ho Rádiu Komunidade sira hamutuk 19 iha territóriu tomak hodi promove atividade komunidade agrikultór sira iha baze.
Sekretáriu Estadu Komunikasaun Sosiál, Expedito Loro Dias Ximenes, hatete, Governu sente katak rádiu komunidade ne’e frontline liña frenti ba informasaun iha komunidade, hodi bele hadi’a jestaun ba iha rádiu komunidade.
“Tanba rádiu komunidade ne’e forma husi komunidade nia atividade ne’ebé halo iha Munisípiu sira ne’e tenke fó atensaun maka’as liu mak, atividade agrikultór nian” dehan nia ba Jornalista sira iha Palacio Governo (21/04).
Nia dehan, Rakom sira tenke foka ba atividade agrikultura liu-liu joven rezisténsia sira nian, atividade feto poténsiál sira,atividade agrikultór ne’ebé halo produsaun iha natar, toos, no mós joven sira ne’ebé mak iha talentu di’ak iha parte múzika.
“bele konvida sira lori mai fahe esperiensia iha talkshow ne’ebé halo iha studiu rádiu komunidade” dehan nia.
Nia haktuir, Tanba osan ne’ebé governu aloka iha tinan ida ne’e bazeia ba proposta la’os fahe tuir sira nia hakarak no mós sira ne’ebé halo relatóriu di’ak tuir regra tanba ne’e mak sira mós hetan tuir sira nia proposta.
Tanba Mínimu kada rádiu komunidade ida hetan rihun hitu to’o rihun walu atu bele ajuda sira sosa rekursu lojístik no mós sira bele halo jestaun administrasaun.
“Mensajen ba sira mak, ne’e osan povu nian tenke jere ho di’ak tanba dala-barak ema hanoin ida ne’e tranferénsia públika no ita bele halo tuir ita nia hakarak”dehan nia.
Mesmu ida ne’e tranferénsia públika maibé tenke responsabilidade atu halo relatóriu ba iha governu, maibé durante ne’e rádiu komunidade balun halo duni relatóriu iha no balun la tuir regras ne’ebé iha.
Maibé La’os halo suspende ba rádiu tolu (3) ne’e, tanba sira halo mal administrasaun katak sira seidauk halo relatóriu ne’ebé di’ak, dala-barak item ne’ebé sira husu atu sosa sira muda fali ba halo buat seluk.
“No ida ne’e regra lei la fó dalan, tanba ne’e mak ami agora tau ketak hela rádiu tolu(3) ne’e mak hanesan rádiu komunidade Aileu, rádiu komunidade taroman Covalima no rádiu komunidade Comoro, tanba sira ne’e mak seidauk bele, maibé tempu oin sira hadi’a fali, governu sei tau fila fali atensaun”dehan nia.
Totál orsamentu ne’ebé governu aloka iha tinan ida ne’e mak rihun $240.000 ba rádiu komunidade sira, maibé balun seidauk, sira ne’ebé asina ona sei halo transferensia ba sira nia konta bankaria.
Reprezenta Radio Komunidade Difisiensia Timor Leste Luciana Alves Agradese ba SEKOMS tanba bele apoiu ona Radio Komunidade Sira iha Timor-Leste.
Orsamentu ne’ebé agora daudauk SEKOMS apoiu ba programa ha’at mak ,ida liga ho programa TALk SHOW,Notisia,TSA no Dram , orsamentu ne’ebe apoiu ne’e ba Fulan sia hahú husi Fulan Abril To’o ba iha Fulan Dezembru.
“Ami Apresia Tebes ba nono Governu konstituisional ne’ebé Mak fó ona apoiu ba Radio Komunidade Fronteira Balibo Lima foin daudauk halo lansamentu iha tinan liu ba agora”dehan nia.
Enkuantu rádiu komunidade iha Territótiu tomak hamutuk 22 no Radio Komunidade 3 mak la konsege tanba kestaun mal administrasaun no SEKOMS asina akordu servisu ho rádiu komunidade mak hamutuk 19.
Jornalista Estajiária : ArcângeladosSantos/Ivonia Dos Santos
Editór : Herminio Cardoso