Loluwari Média (Liquiça) – Fundasaun Ran Amigu Karidade (FURAK), enkoraja jovens estudante Universitáriu sira atu kria amizade hodi junta forsa ba asaun karidade iha sosiedade nia leet.
Fundadór FURAK Januario Soares “Rio” hato’o asuntu ne’e hafoin sai oradór iha semináriu ida ne’ebé Organiza husi komunidade Joven ba Asaun Solidariedade (KJAS) ne’ebé halao iha suku Dato, Postu Administrativu Liquiça Villa, Munisípiu Liquiça.
Tuir Rio Soares, atu haklean estudante sira nia koñesiementu ba iha asaun karidade no saida mak asaun solidariedade ne’ebé durante ekipa furak hala’o mak tenke unidade.
“ita nu’udar joven nia Kontribuisaun ba ita nia rain ida ne’e la presiza susesu uluk maibé iha ita nia moris ita presiza halo asaun solidariedade hodi ajuda ema kbi’it laek ne’ebé ita haree no ita rona la presiza husi Governu maibé ita ho ita mak lolo liman ba malu”dehan Rio Soares iha Munisípiu Liquiça sucu Dato, Sabadu (25/04).
Nia informa,solidariedade ne’e mai husi fuan ne’ebé prontu atu servi tanba solidariedade ne’e mai husi ema nia karakter tamba ema hotu-hotu hanesan maibé ema ida rua mak hamriik hodi ajuda ema seluk liu-hosi asaun Solidariedade.
“Ha’u husu ba Joventude sira liu-liu Universitáriu ne’ebé kria grupu KJAS saida mak ita bo’ot sira kontribui ona ba nasaun ida ne’e, laos husi buat boot maibé iha ita nia vida ita halo ona Asaun Solidariedade ita la presiza hein buat boot”dehan nia.
Rio Soares fó ezemplu hanesan Ekipa konsege halo uma 30 ba komunidade iha munisípiu inklui mós iha kapitál Díli ho nia baze orsamentu riuun rua resin.
Husi orsamentu balun husi nia saláriu servisu no doadores sira seluk maibé governu nein apoiu orsamentu ba nia ekipa FURAK ho uma simples ne’ebé halo durasaun semana entrega tenke ba benefisiáriu.
“Hakarak jovens ne’ebé hamriik atu fó ita nia solidariedade ba ema la espera atu simu saláriu maibé imi nia rekursu mak atu serví ba hirak ne’ebé nesesita iha ita nia moris”dehan nia.
Tanba Durante ekipa FURAK halao Asaun karidade ba ema vulnerável hanesan ferik-katuas, ema ho Difiseinte no labarik sira ne’ebé lakon nia eskola laiha uma atu hela no familia sira soe hela ida ne’e mak durante Ekipa ajuda.
Maibé Ko’alia kona-ba Igualdade ema hotu-hotu iha direitu atu hetan ajuda maibé presija haree mós ida ne’ebé vulneravél liu, liu-liu iha área rurál se presiza Ai-han Ekipa to’o kedas ho Ai-han la presiza tenke liu-husi Autoridade Lokál sira.
“se ida ne’ebé presiza uma Ekipa halo duni uma ba nia para nia sente nia moris tomak iha mudansa”dehan nia.
Solidariedade ne’e ho sentimentu humanu ba ema sira ne’ebé presiza tulun se laiha se sentimentu ho vontade mak sei laiha asaun atu halo karidade ba ema.
“Hanesan Estudante tenke kria amizade iha ita nia uma laran hafoin ba bairu laran inklui iha ita nia Eskola siknifika ita kontribui ona ba páz hafoin ita halo asaun karidade maibé presija ita nia solidu no rona malu”dehan nia.
Prezidente Ezekutivu Organizasaun komunidade Joven ba Asaun Solidariedade (KJAS), Serilio Duarte, sente orgullu ba Fundador FURAK ho nia ekipa hodi partilla esperiénsia ba komunidade Joven ba Asaun Solidariedade.
“Ami sente orgullu tebes tanba Fundador FURAK bele mai partilla nia esperiénsia ba ami nia Estudante foun ano letivu 2026 nian”dehan nia.
Tanba KJAS hakarak halo kooperasaun ho ekipa FURAK lao ba oin nafatin hodi hanoin ba futuru ida ne’ebé di’ak ba povu doben Timor-Leste.
Tanba ho hanoin ida katak labele husu buat ruma ba nasaun maibé hanesan Joventude saida mak presiza halo hodi bele kontribui ba nasaun.
“Hanesan Joventude foin-sa’e mai ita lolo liman hamutuk hodi haree ba futuru saida mak ita tenke halo liu-husi halo asaun karidade ita kria paz no estabilidade iha ita nia rain ida ne’e.”
Entretantu Organizasaun komunidade Joven ba Asaun Solidariedade (KJAS) hala’o Semináriu ho Tema “Kontribuisaun Joventude nian, ba Dezenvolvimentu Nasionál liu-husi Asaun Solidariedade”.
Estudante sira ne’ebé prezensa mak hanesan Universidade Nasionál Timor-Lorosa’e (UNTL), Universidade da Paz (UNPAZ), Institutu Superior Cristal (CRISTAL), Universidade de Díli (UNDIL), Instituto de Ciéncias Sosiais (ICS), Universidade Católica Timorense (UCT) no Universidade Oriental Timor-Lorosa’e (UNITAL) inklui ensiñu sekundária 12 de Novembru no 4 de Setembru iha Munisípiu Liquiça
Jornalista : Cesar Pires
Editór : Herminio Cardoso