Loluwari Media (Díli) – Grupu profesór destakadu sira husi territóriu nasionál kestiona kualidade edukasaun iha Timor-Leste ne’ebé konsidera la ekilibradu ho kondisaun moris ba profesór.
Profesór sira kestiona tanba to’o agora ME la konsidera sira hodi foti asaun imediata ba kestaun subsídiu sira hasoru iha remota, kona-ba alojamentu.
Tanba ne’e, Portavóz, Feliciano da Silva, hatete, Ministeriu Edukasaun seidauk iha koordenasaun ne’ebé di’ak husi nasionál to’o baze, liuliu kona-ba implementasaun direitu profesór sira-nian ne’ebé prevee ona iha lei.
“Ita labele ko’alia de’it kona-ba eleva kualidade edukasaun se kondisaun profesór sira-nian la apropriadu, Se profesór sira moris iha situasaun ekonómika ne’ebé difísil, oinsá sira bele prepara matéria no transmite siénsia ho di’ak ba labarik sira?” dehan nia ba jornalista sira iha jardin 5 de Maio foin lalais ne’e.
Nia informa, Profesór sira ne’e ezije atu Governu kumpri Dekretu-Lei No. 31/2023 no No. 20/2010 ne’ebé regula subsídiu kolokasaun, subsídiu área remota, no subsídiu alojamentu hamutuk $100 fulan-fulan ba sira ne’ebé aluga uma.
Joni Madeira, profesór ida ne’ebé destakadu iha Maubara-Lissa, lamenta ho klasifikasaun área ne’ebé ME halo tanba Iha baze, estrada aat, dala-ruma bee laiha no dala-ruma ahi mate.
“tamba ne’e ami haree no senti dunik katak ami ne’e iha área remotas,sira klasifika fali ami iha área ‘urbana’. Ne’e prejudika tebes ami-nia direitu ba subsídiu remota,” nia esplika.
Alende kestaun finanseira, profesór sira mós denunsia katak iha iha prátika familiarizmu no nepotizmu iha prosesu transferénsia.
Enkuantu Jaime Ataide da Cruz, profesór destakadu husi Atabae, kestiona ME ne’ebé hasai sirkulár bandu transferénsia, maibé iha realidade, profesór balu ne’ebé iha koñesimentu ho ema boot sira konsege muda fatin ho fasil.
“Ami husu ba Ministériu atu trata ema hotu ho prinsipál igualdade. Labele uza sirkulár hodi impede de’it ami ne’ebé la iha família iha laran, balu muda tuir sira-nia hakarak”dehan nia.
Tanba ne’e karik Ministeriu Edukasaun la fó resposta ka la kria kondisaun permanente iha tempu badak,maka sira sei husu atu koloka fali sira ba sira-nia fatin orijem.
Jornalista Estajiariu : Quintão Dos Santos
Editór : Herminio Cardoso