Loluwari Média (Díli) – Membru Polísia Nasionál Timor-Leste (PNTL) na’in 15 remata kursu lian Inglés báziku iha Centro Formasaun Polícia (CFP) hodi envolve an iha ASEAN Pol.
Reprezentante Komandante Jerál Polísia Nasionál Timor-Leste (PNTL), Komisariu Assistente Polísia, José Soares, Hatete, komandu PNTL servisu hamutuk ho TLPDP ne’ebé mak sai parseiru ba nasaun Timor-Leste tinan ruanolu-resin-rua (22), hanesan parseiru ne’ebé mak kleur fó sira nia apoiu ba PNTL halo kapasitasaun iha área oi-oin, hanesan jestaun, investigasaun no infraestrutura balu nian, depois agora foka liu ba iha kursu lian inglés nian, agora Timor-Leste nu’udar membru permanente ASEAN, nune’e mós PNTL sei integra an ba iha ASEAN da Pol iha fulan juñu nia laran, tenke prepara rekursu PNTL nian nune’e iha koñesementu no iha abilidade ba iha komunikasaun iha nasionál ho parseiru sira iha rejionál, iha ASEAN nomós iha nível internasionál.
“Ho koñesementu ne’ebé mak iha ita bele liga ita ho ema seluk nune’e ita bele transmite ita nia hanoin no hakarak para ema bele komprende.”Dehan Reprezentante Komandante Jerál Polísia Nasionál Timor-Leste (PNTL), Komisariu Assistente Polísia José Soares ba jornalista sira iha Centru Formasaun Polísia (CFP) Comoro Díli, kinta (30/04).
Nia Dehan Kursu ne’e nu’udar kursu báziku lian inglés ba PNTL, totál 15 pesoas tanba ida ne’e foin dahuluk halo, no konsentra iha Centro Formação Polísia iha tempu liu ba servisu hamutuk ho TLPDP halo kursu iha servisu fatin, no SOLS, maibé nia rezultadu ladun di’ak tanba la kesi membru sira, entaun ikus mai aujensia membru nian maka’as kompara ho loron dahuluk ho hanoin ida ne’e mak komandu, ko’alia ho TLPDP, bele konsentra iha CFP ne’ebé mak reprezenta husi Unidade sira no departamentu sira tuir mai munisipiu hotu-hotu tenke reprezentativa, atu nune’e bele sente katak formasaun ne’e ba PNTL.
“Kursu iha CFP di’ak tanba sira fokus, sira livre tiha husi sira nia servisu, la iha ordem husi sira nia komandante katak presija urjente tenke halo buat ruma, no ami haree ne’e aproximasaun ida ne’ebé mak di’ak no kapaz, ida ne’e mak ami sei kontinua, ko’alia ita nia parseiru atu nune’e ita bele mantein ida ne’e ba oin hahú husi nível báziku ida agora para intermediate hodi avansadu, atu nune’e PNTL iha kapasidade iha língua bele ko’alia ho ita nia parseiru sira, 2029 ita sei lidera ASEAN Cimera ASEAN iha Timor-Leste no tuir fali sei enkontru fali ho ASEAN da Pol, ne’e komunikasaun hotu la iha tradusaun hakarak ka lakoi ita tenke prepara ita nia-an no esforsu ita nia-an, no hau apela ohin loron ne’e mundu ki’ik la hanesan ho tempu uluk, ohin loron mundu iha ita nia liman, telemovel ne’ebé mak alin sira kaer tenke aproveita matéria sira liuhusi média sosiál sira, ne’ebé mak ho konteúdu inglés para bele hadi’a ita nia inglés doque ita hein de’it, dalaruma tempu la to’o maibé mundu ohin ki’ik aproveita meius sira ne’e atu bele ekipa ita nia-an nune’e ita bele iha konfiansa hatudu katak Timor-Leste mós bele.”
PNTL apresia boot ba TLPDP hanesan parseiru antigu iha Timor-Leste hamutuk ho PNTL halo formasaun oi-oin ba PNTL espera katak ba oin sei di’ak liu ida ne’e.
Iha Fatin hanesan Komandante TLPDP, Daren Boy Skinner Dehan, TLPDP sei foka liu ba iha área ne’ebé mak estabelese husi PNTL nomós bazeia ba rekezitu ne’ebé mak governu Timor-Leste hato’o.
“Hanesan parseiru PNTL ami orgullu tebe-tebes, tanba ohin PNTL sira bele kompleta kursu lian inglés ho susesu.”
Tuir nesesidade ida ne’ebé agora daudaun PNTL presija aprende lian inglés tanba ba futuru sira mós sei envolve iha ASEAN da Pol ninian, tanba sira nia movimentu sei ho lian inglés tanba ne’e mak presija tebes atu sira bele hatene lian inglés.
“Iha área prioridade barak ne’ebé mak ami sei konsentra ba futuru ninian, kona-ba dezenvolvimentu ka kapasitasaun ba PNTL, TLPDP mós sei haree ba iha área ida ne’ebé mak prioridade liu ba iha Instituisaun PNTL para oinsá sira bele suporta ba koñesementu nomós bele servisu ho di’ak liu tan ba komunidade.”
Jornalista Estajiada : Arcângela dos Santos
Editor : Herminio Cardoso