Loluwari Média (Lautém) – Ministeriu Juventude Desportu Arte No Kultura (MJDAK) Apoiu Orsamentu hamutuk 3.500.00 Ba Juventude Postu Lautém hodi loke torneiu jogu futsal no voleibal ba feto no mane hodi anima komunidade sira husi suku 10 atu komemora loron independensia 20 de Maiu ba dala 24.
Prezidente Komisaun organizadora (KO) Acacio da Costa, hatete, orsamentu ne’ebé MJDAK apoiu ne’e hamutuk 3.500.00 hodi loke desportu komunitaria ba joven sira husi suku 10 iha postu lautém.
“Apoiu fundus ne’ebé MJDAK Preve orsamentu hamutuk $. 3,500.00 atu Komisaun finansia ba atividade desportu komunitaria bazea ba narativa,” Dehan presidente KO Acasio da Costa ba loluwari.tl liu husi whatsapp domingu (02/05).
Acasio esplika, kona-ba jogu desportu komunitariu iha KO prepara modalidade 4 mak, modalidade jogu futsal mane, voleibal feto-mane, modalidade jogus tradisionais hanesan dada tali ba mane no tiru kalik ba feto.
“Númeru partisipante ba jogu desportu komunitariu postu administrativu Lautém ne’e mai husi modalidade 4 mak hanesan, modalidade Futsal mane ho klubu reprezenta suku 10 hamutuk 19 no ekipa instituisaun hamutuk 5, tanba ne’e total 24 klubu ou ekipa futsal, modalidade voleibal feto hamutuk ekipa 7 no mane hamutuk 7 total 14 klubu ou ekipa voleibal,” Nia relata.
Nia hatutan, kona-ba modalidae jogus tradisionais seidauk implementa tanba sei iha hela faze rejistrasaun no jogus tradisionais ne’e sei halo iha 20 de maiu de maiu nia laran.
“Modalidade tradisionais dada tali mane iha hela faze rejistrasaun no tiru kalik ba feto iha hela faze rejistrasaun, jogus sira ne’e sei hahu iha 20 de maiu nia laran hafoin dada bandeira hotu,” Nia afirma.
Reprejentante PAM Lautem, Sekretariu Munisipal Planeamentu Investimentu Dezenvolvimentu Integrado, Tiborsio dos Santos, agradese ba APA Lautém no juventude suku 10 tanba kada tinan loron bo’ot sempre organiza malu hodi loke torneiu ka eventu jogu komunitaria desportu hodi bele anima komunidade sira iha postu lautém.
“Hau reprezenta PAM Lautem hato’o parabens no agradese ba APA Lautém no juventude husi suku 10 tanba tinan-tinan hanesan loron bo’ot ruma joven sira hamutuk hodi organiza eventu jogu komunitario ne’e ho diak tanba bele anima ita nia komunidade sira,” Tiborsio dehan.
Tiborsio haktuir, ha’u hanoin iha semana kotuk ha’u reprezenta mos ita nia Prezidente autoridade ba iha postu lospalos iha suku 3 mak organiza, suku Leuro, suku Cacavei no suku Soru ne’ebé sira mos hetan finanseiru uitoan hodi ne’e bele komemora ita nia loron 20 de maiu.
Sekretariu Munisipal ne’e husu ba juventude sira ne’ebé partisipa eventu ne’e katak, iha ne’ebé jogu la’o iha kampu laran sempre kona malu maibe labele lori ida ne’e sai problema hodi estraga malu.
“Liu husi eventu sira hanesan ne’e oinsa husu ba alin sira partisipa iha eventu ida ne’e liu-liu ba desportu nian atu tau as ita nia amizade ita nia fraternidade atu nune’e bainhira ita joga karik lakon ita tenke simu realidade hodi nune’e ita bele aprende fila-fali hodi treinu fila-fali aban bainrua jogu iha tan karik bele manan. Tanba ita mai iha kampu hatudu ita nia disiplina ita nia talentu iha kampu laran hodi nune’e ita bele hetan mellor ne’e,” Nia Motiva.
Entretantu suku 10 ne’ebe mak tuir jogu komunitario postu lautem mak hanesan, suku Daudere, Baduro Serelau, Euquise, Ililai, Com, Mahina I, Mahina II, Pairara no Parlamentu.
Jornalista : Alberto Pires
Editor : Herminio Cardoso