Loluwari Média (Manatuto) – Vitima Lakon Esperansa ba Mahon ne’ebé durante satan Anin, Udan, Mahon ven, Loron Manas no Malirin ohin nakfilak ba Ahuk desan de’it.
Vitima Bermalino Soares, Hatete, Horikalan mais ou menus tuku 11 ho balu derepente ahi lakan iha uma kakuluk tanba vitima ho nia Familia deskansa ona ho uma ne’ebé durante sira hela ho Medida 8×8 ne’ebé taka ho tali tahan ho nia dapur 4×5 ne’ebé taka ho tali tahan de’it.
“Ami hakfodak derepente ahi lakan husi uma kakuluk tanba ami toba dukur ona entaun ami hakfodak haree ahi lakan bo’ot nune’e ha’u tauk no preokupa ha’u nia oan sira ne’ebé ki’ik entaun kalan ha’u ho ha’u nia fen sala uluk labarik sira ami kous halai sai hotu mai liur ahi komesa lakan boot ami buka bee laiha entaun ami la konsege hamate ahi to ahi han mutuk ha’u nia uma ho dapur dala ida.” Dehan Vitima Bermalino Soares, ba jornalista Loluwari iha nia Rezidensia Suku Laku Mesak Aldeia Tahagamu Laclo, Sabadu (02/05).
Nia Dehan bainhira ahi lakan bo’ot iha uma kakuluk nia mos hakfodak maibé nia tenke salva uluk nia oan sira no esforsu atu salava Sasan sira iha uma laran maibé la konsege tanba ahi nia lakan boot los ona.
“Ahi lakan bo’ot los ha’u halai ba mai buka bee atu rega maibé ami nia uma vizinu mós toba dukur entaun susar ba ha’u atu hamate ahi no atu halai tama maibé ne’e ita lori ita nia mate ona tanba ne’e ami labele salva ami nia sasan uma laran husi kiik too bo’ot ahi han mutuk hotu.”
Nia sente triste bainhira ahi han mutuk nia uma ho nia dapur dala ida tanba uma ne’ebé hada ho média aprende no taka ho uma tali no dapur mós uma tali ne’ebé ahi han kuaze oras ida ho balu uma ho dapur mutuk hotu.
“Ha’u sente triste tebes ba ha’u nia uma ne’ebé durante Ha’u ho hia família simples ne’e hela hodi satan Anin no Udan, Loron manas no Malirin maibé hori kalan situasaun oinseluk mai ami família kiik ne’e triste tebes tanba ami labele salva ami nia sasan uma laran inklui ha’u nia oan sira nia ropa hatais nomos ropa eskola nian nomós ami nia osan Dolar Atus ida resin mós ahi han mutuk hotu.”
Vitima iha oan na’in 6 kompostu husi feto na’in 3 no mane na’in 3 no agora daudaun nia oan na’in 3 mak eskola Primaria no na’in tolu seidauk asesu Edukasaun.
Xefe Suku Laku Mesak Luis Mendonça, Dehan, Ohin dader nia simu informasaun katak akontese Insendiu ka ahi han mutuk nia komunidade nia uma iha Sucu Laku Mesak Aldeia Tahagamu Postu Administrativu Laclo Munisípiu Manatuto.
“Ha’u hanesan Aman no Autoridade sente preokupa no triste bainhira rona novidades ida ne’e entaun ohin dadersan de’it ha’u nia prezensa mai iha ne’e atu foti imajen no rekolla dadus hodi relata ba parte kompetente liuliu Autoridade Protesaun Sivil (APC) Munisípiu Manatuto nian hodi bele apoiu Emergensia ba ita nia Vitima sira.”
Nia Esplika Ohin ne’e kedas hanesan Autoridade lokal relata dadus ba insendiu ne’e ba APC Munisípiu Manatuto nian no iha ona resposta karak APC sei apoiu emergensia imediata ba komunidade Vitima refere.
“Ha’u hanesan Autoridade lokál ha’u nia prezensa iha ne’e nu’udar aman ba ha’u nia komunidade maibé ami mós la espera katak Sidadaun Januário Soares “Rio ” ho nia ekipa nomós Média Loluwari no Media DíliPost ne’ebé bele marka prezensa iha dader Kmanek ida ne’e hodi bele apoiu nesesidade bazika no bele halo kobertura ou hatutan no habelar hela informasaun ba parte hotu-hotu atu bele rona no haree ba ita nia familia Vitima afetada sira iha Aldeia Tahagamu ida ne’e, ami mós lahaluha hato’o obrigadu wain ba Ekipa Januário Soares no Média Loluwari no DíliPost nia prezensa iha ne’e.”
Fundador Fundasaun Ran Amigo Karidade (FURAK), Januário Soares “Rio” Dehan, Ohin Ekipa FURAK halao nia asaun karidade iha Munisípiu Manatuto Postu Administrativu Laclo maibé tun iha terenu la espera katak hori kalan iha akontesimentu Insendiu ka ahi han komunidade nia uma ida.
“Ohin ita mós la espera katak Insendiu ne’e akontese ona ba ita nia komunidade entaun durante ne’e buat ne’ebé ita hakarak mak atu servi dini ba ita nia komunidade ne’ebé hetan terus liu-liu ho buat ne’ebé la espera entaun ohin ita fornese ho buat ne’ebé mak ita iha ba família Vitima Insendiu mak ami apoiu Nesesidade bazika fos saku 4, Mina, Supreme, Masin, Rinso no Sapatu ne’ebé ita ajuda dahuluk maibé espera katak parte relevante sira sei mai halo apoiu material ba ita nia Vitima Insendiu ida ne’e.
Ohin mos Autoridade Lokál hanesan Xefe Suku no Xefe Aldeia sira marka prezensa iha ne’e sei foti dadus detaillu hodi pasa ba parte relevante hanesan APC Munisípiu Manatuto nian hodi bele apoiu material kontrusaun nian ba Vitima refere.
“Ohin ita hotu haree Insendiu ne’ebé akontese ita hotu sente triste tanba família lakon uma lakon sasan uma laran no lakon buat barak maibé ho ita nia prezensa ba ita nia maluk ne’ebé hetan susar hodi fo apoiu la barak maibé ho buat ne’ebé ita iha mak nesesidade bazika ida ne’e sai hanesan motivasaun ida ba familia ida ne’e la sente mesak maibé iha Timor ne’ebé hakarak ajuda nia iha tempu ne’ebé triste.”
Jornalista : Cesar Pires
Editor : Herminio Cardoso