Loluwari Média (Baucau) – Konseleiru Maximu Partidu Kmanek Haburas Unidade Nasional Timor Oan (KHUNTO) Jóse dos Santos “Naimori Bucar” kontinua fó pose ba nia militantes sira iha baze hodi hametin estrutura.
Seremónia pose ne’e hala’o ba militante no simpatizante hamutuk 300 ne’ebé simu pose iha Munisípiu Baucau Vila Suku Triloca-Aubaca.
“Ha’u fó parabens tanba ita bele hetan istoria foun ida tanba durante hahú Khunto la’o, iha Timor aman sira barak sira hatene no sira haree mais sira hamriik iha oin,mais ohin halo istoria foun ita nia aman veteranus sira bele hamriik iha partidu Khunto nia oin,” Dehan Konseleiru Maximu P. Khunto Jóse dos Santos “Naimori Bucar” ba jornalista sira iha, Triloca-Aubaca Sabadu (09/05).
Naimori mos fo parabens ba veteranus Nunura tanba lori veteranus Baucau mai hamutuk ho partidu Khunto.
“Ha’u hato’o ha’u nia parabens mós ba na’i veteranus no veteranas sira ba inan-aman alin joven sira ne’ebé ohin simu tomada de pose”
Pose ne’e sai hanesan sasukat bo’ot ida iha esperensia bo’ot ida atu nune’e koñese liu tan politika,ho aman veteranus Nunura no estrutura tomak sai forsa ida ba povu Timor-Leste.
Tanba ne’e Konseleiru Maximu husu ba estrutura sira ne’ebé simu ona pose servisu hamutuk ho domin atu fó vitoria ba KHUNTO iha elisaun sira oin mai.
“Ha’u husu ba estrutura hotu atu kontinua servisu hamutuk ho disiplina, responsabilidade no espíritu domin no unidade nasionál ”
Tanba ne’e tenke hametin estrutura atu prepara aan hodi fó vitoria ba partidu KHUNTO iha eleisaun Prezidensiál 2027, eleisaun Kámara Munisipiu no mós eleisaun parlamentar 2028.
Veteranus Mário de Sousa Guterres ho Kodigu “Nunura” haktuir, tinan barak liu ba kotuk nia mós gasta ona tempu ba partidu sira seluk hodi fó vitoria maibé seidauk rekoñese di’ak veteranus sira nia luta no sofrimentu ne’ebé sira senti iha tempu liu ba.
“Ha’u kontribui barak mós ba partidu bo’ot sira hanesan buka bukae buka hahan fó han lafaek mais lafaek bosu tiha ha’u atu ba lafaek siak”dehan nia.
Veteranus Nunura hakarak tama partidu Khunto la’os ema ida mak hatudu dalan tanba partidu bobo’ot sira nia liu hotu tiha ona buat ne’ebé atu defende mós ba povu.
Veteranus Marcelino Freitas ho kodigu “Bitimori” afirma laos lori veteranus Munisípiu Baucau nia naran maibé hanesan pesoál husu ba veteranus no inan-aman sira atu mai hamutuk ho partidu KHUNTO.
“Marcelino veteranus dunik mak ha’u, tanba ne’e hakarak atu fó informa ba inan-aman no maluk sira atu mai partidu KHUNTO”haktuir nia.
Jornalista : Alberto Pires
Editor : Herminio Cardoso